काठमाडौं । संघीय संसदले संसदीय गतिविधि र सूचनालाई डिजिटल माध्यमबाट एकीकृत रूपमा उपलब्ध गराउने उद्देश्यसहित ‘डिजिटल पार्लियामेन्ट’ प्लेटफर्म सञ्चालनमा ल्याएको छ।
हाल परीक्षणका रूपमा प्रयोग भइरहेको यो प्रणालीको प्रतिनिधिसभाका सभामुख डोलप्रसाद अर्याल र राष्ट्रिय सभा अध्यक्ष नारायणप्रसाद दाहालले संयुक्त रूपमा शुभारम्भ गरे।
प्लेटफर्ममार्फत संसद्सँग सम्बन्धित सूचना, विधेयकको प्रगति, संसदीय क्यालेन्डर, सांसदको उपस्थितिसहित विभिन्न समिति तथा उपसमितिका गतिविधि एउटै डिजिटल माध्यमबाट हेर्न सकिने व्यवस्था गरिएको छ।
शुभारम्भ कार्यक्रममा सभामुख अर्यालले संसदीय कामकारबाहीलाई थप व्यवस्थित र नागरिकका लागि सहज बनाउन डिजिटल प्रणाली उपयोगी हुने बताए। उनका अनुसार संसद्को पुरानो अभिलेखलाई समेत क्रमशः डिजिटल स्वरूपमा सुरक्षित राख्दा भविष्यमा अध्ययन तथा अनुसन्धानका लागि महत्वपूर्ण आधार तयार हुनेछ।
अर्यालले सार्वजनिक निकायका कामलाई थप पारदर्शी र नागरिकमैत्री बनाउन प्रविधिको प्रयोग आवश्यक रहेको धारणा राखे। उनले संघीय संरचनाका विभिन्न तह र राज्यका निकायमा डिजिटल प्रणालीको विस्तारले जनविश्वास बढाउन सहयोग पुग्ने बताए।
राष्ट्रिय सभा अध्यक्ष दाहालले पनि कागजी प्रक्रियालाई डिजिटल प्रणालीमा रूपान्तरण गर्दा संसदीय काम छिटो, पारदर्शी र जवाफदेही बनाउन सहज हुने बताए।
उनले संसद्मा नयाँ पुस्ताका सांसदको सहभागिता बढ्दै गए पनि परम्परागत कागजी अभिलेखमा निर्भरता अझै रहेको उल्लेख गरे। डिजिटल प्रणाली प्रभावकारी बनाउन सांसद तथा कर्मचारीलाई आवश्यक प्राविधिक ज्ञान र व्यावहारिक तालिम दिनुपर्नेमा उनले जोड दिए।
नेपालमा डिजिटल संसद्को अभ्यास प्रारम्भिक चरणमा रहेकाले देशको आवश्यकता र उपलब्ध स्रोतअनुसार यसलाई क्रमशः विस्तार गर्दै लैजानुपर्ने दाहालले बताए।