राष्ट्रिय प्रजातन्त्र पार्टी (राप्रपा) वागमती प्रदेश संसदीय दलका नेता उद्धव थापाले आफूहरू ‘बिकेको’ आरोप प्रमाणित गर्न पार्टी अध्यक्ष राजेन्द्र लिङ्देनलाई २४ घण्टाभित्र प्रमाण सार्वजनिक गर्न चुनौती दिएका छन्।
बुधवार धुम्बाराहीस्थित पार्टी कार्यालयमा ज्ञापनपत्र बुझाउँदै थापाले ‘को बिक्यो, कति रकममा बिक्यो, कसले किन्यो, कहिले, कहाँ र कसरी लेनदेन भयो’ भन्ने विवरणसहित प्रमाण सार्वजनिक गर्न माग गरे।
आरोप प्रमाणित भए आफूहरूमाथि जुनसुकै कारबाही स्वीकार गर्ने बताउँदै उनले प्रमाण दिन नसके अध्यक्ष लिङ्देनले सार्वजनिक रूपमा माफी माग्नुपर्ने बताए। उनले गण्डकी प्रदेशमा राप्रपाका दुई सांसदले नेपाली कांग्रेस नेतृत्वको सरकारलाई समर्थन गरिरहेको विषयमा पनि पार्टीले त्यसबाट प्राप्त लाभ र निर्णयको लेखाजोखा गर्नुपर्ने बताए।
राप्रपा अध्यक्ष लिङ्देनले वागमती प्रदेशका सांसदहरूलाई नेकपा एमालेले ‘खरिद’ गरेको आरोप लगाएपछि त्यसविरुद्ध वागमती प्रदेश कार्यसमितिको नेतृत्वमा सांसदहरूले ज्ञापनपत्र बुझाएका हुन्।
वागमती प्रदेश कार्यसमितिका अध्यक्ष विक्रमबहादुर थापाले सांसदहरूमाथि गरिएको कारबाही र ‘बिकेको’ भन्ने अभिव्यक्ति फिर्ता लिन अध्यक्ष लिङ्देनलाई आग्रह गरे। राजनीतिक निर्णयमा असहमति राख्न पाइने भए पनि आफ्नै पार्टीका निर्वाचित जनप्रतिनिधिमाथि व्यक्तिगत तथा चरित्रसम्बन्धी आरोप लगाउन नमिल्ने उनले बताए।
ज्ञापनपत्रमा वागमती प्रदेशका सांसदहरूमाथि गरिएको कारबाही तत्काल फिर्ता लिन, व्यक्तिगत लाञ्छना लगाउने प्रवृत्ति अन्त्य गर्न तथा पार्टीभित्र विधि, विधान, पारदर्शिता र राजनीतिक मर्यादा कायम गर्न माग गरिएको छ। साथै कोशी प्रदेशमा सभामुख पद कायम राख्ने र गण्डकीमा नेपाली कांग्रेसका मुख्यमन्त्रीलाई विश्वासको मत दिने निर्णयलगायत अध्यक्ष लिङ्देनका विगतका निर्णयमाथि पनि प्रश्न उठाइएको छ।