नेपाली कम्युनिष्ट पार्टी (नेकपा)का प्रमुख सचेतक युवराज दुलालले मेलम्ची खानेपानी आयोजनाका प्रभावित तथा स्थानीय भेन्डर्सका माग तत्काल सम्बोधन गर्न सरकारको ध्यानाकर्षण गराएका छन्।
प्रतिनिधिसभाको बिहीवारको बैठकमा बोल्दै उनले प्रभावित पीडित भेन्डर्स संघर्ष समितिले आजदेखि मेलम्ची खानेपानी आयोजनाका सवारीसाधन तथा कर्मचारीलाई आयोजनास्थल प्रवेशमा रोक लगाउने घोषणा गरेको जानकारी दिए। आन्दोलनका कारण मेलम्ची खानेपानी आयोजनाको काम प्रभावित भई आयोजना सञ्चालनमा समस्या आउन सक्नेतर्फ उनले सरकारको ध्यानाकर्षण गराए।
यसअघि मेलम्ची बाढी तथा खानेपानी आयोजनाबाट प्रभावित पीडित र स्थानीय भेन्डर्सले पानी पथान्तरण बन्द गरेर सरकारसँग विभिन्न सम्झौता गरे पनि ती सम्झौता अझै कार्यान्वयन हुन नसकेको उनले बताए।
प्रमुख सचेतक दुलालले मेलम्ची बाढीपीडित संघर्ष समितिले प्रभावित क्षेत्रको पुनर्निर्माण, सडक निर्माण तथा बाढीबाट क्षति पुगेका संरचनाको पुनर्निर्माणलाई मुख्य माग बनाएको बताए। स्थानीय भेन्डर्सले पनि सरकारबाट आफूले प्राप्त गर्नुपर्ने विषय सम्बोधन गर्न माग गर्दै आएको उनले बताए।
उनले भने, ‘मेलम्ची खानेपानी आयोजनाका प्रभावित पीडित भेन्डर्स संघर्ष समितिले आज एउटा आन्दोलनको घोषणा गरेको छ। आजदेखि मेलम्ची खानेपानी आयोजनाका कुनै पनि गाडी तथा कर्मचारीलाई आयोजनास्थलमा प्रवेश गर्न नदिने घोषणा गरेको छ। यसले मेलम्ची खानेपानी आयोजना प्रभावित हुने तथा निरन्तरता दिन समस्या हुन्छ। मेलम्ची बाढी र खानेपानी आयोजनाबाट प्रभावित पीडित तथा संघर्ष समिति र लोकल भेन्डर्स समितिले यसअघि पनि पानी पथान्तरण बन्द गरेर सरकारले पटक–पटक विभिन्न सम्झौता गरेको छ। त्यसअन्तर्गत बाढीपीडित संघर्ष समितिले प्रभावित क्षेत्रको पुनर्निर्माण, त्यहाँको सडक र बाढीले क्षति पुर्याएको ठाउँलाई प्रमुख मुद्दा बनाएको छ भने लोकल भेन्डर्सले सरकारबाट आफूले प्राप्त गर्नुपर्ने विषयलाई मुद्दा बनाएको छ। यो दुःखद् क्षण नआओस् र फेरि पनि पानी पथान्तरण बन्द गर्नुपर्ने तथा जनताले दुःख पाउने स्थिति नआओस्।’
दुलालले मेलम्चीदेखि हेलम्बुसम्मको सडक निर्माणका लागि बहुवर्षीय ठेक्का तत्काल स्वीकृत गर्न र मेलम्चीदेखि पाँचपोखरीसम्मको सडकको बहुवर्षीय ठेक्का प्रक्रिया पनि अविलम्ब अगाडि बढाउन सरकारसँग माग गरे।
उनले विगतमा सरकारले पीडितसँग गरेका सम्झौता तत्काल कार्यान्वयन गर्नसमेत माग गरे।