नेकपा (एमाले)का सांसद चन्द्रेश्वर मण्डलले सुनसरीको देवानगञ्ज र सिराहाको गोलबजारमा भएका साम्प्रदायिक तनावका घटनाबारे छानबिन समितिको प्रतिवेदन तत्काल सार्वजनिक गर्न सरकारसँग माग गरेका छन्।
प्रतिनिधि सभाको बिहीवारको बैठकमा बोल्दै उनले हिन्दू र मुस्लिम समुदाय वर्षौंदेखि मिलेर बसे पनि ती घटनाले दुई समुदायबीचको एकतामा गम्भीर असर पारेको बताए। छानबिन समितिले सरकारलाई बुझाएको प्रतिवेदन सार्वजनिक गरी दोषीलाई कडा कारबाही गर्न उनले माग गरे।
सांसद मण्डलले चाडपर्वको मुखमा दैनिक उपभोग्य वस्तुको मूल्य बढेको र अभावसमेत हुन थालेको भन्दै सहज आपूर्तिको व्यवस्था गर्न सरकारको ध्यानाकर्षण गराए। खाना पकाउने ग्यास, आलु, प्याज, चिनी र खाने तेललगायतका वस्तुको अभाव हुन थालेको भन्दै उनले उपभोक्ताले घण्टौँ लाइनमा बस्नुपर्ने अवस्था अन्त्य गर्न माग गरे।
भारतमा सम्पन्न ब्रिक्स सम्मेलनमा नेपालको उपस्थिति नहुनु दुःखद भएको उल्लेख गर्दै मण्डलले यसले नेपालको परराष्ट्र नीतिमा समस्या उत्पन्न भएको हो कि भन्ने प्रश्न गरे। छिमेकी तथा मित्रराष्ट्रसँगको सम्बन्ध थप सुमधुर बनाउन उनले सरकारको ध्यानाकर्षण गराए।
त्यस्तै, मधेस प्रदेशका आठ जिल्लाका करिब ८० हजार युवा लागूऔषधको समस्यामा परेको दाबी गर्दै उनले यसको नियन्त्रणका लागि प्रभावकारी कदम चाल्न सरकारसँग माग गरे।
मण्डलले मधेसको ‘लाइफलाइन’का रूपमा रहेको हुलाकी राजमार्गअन्तर्गत कमला पुलको निर्माण कार्य तीव्र बनाउन पनि सरकारको ध्यानाकर्षण गराए।