यातायात व्यवसायी तथा श्रमिकहरूले कीर्तिपुर बर्न अस्पताल बाहिर प्रदर्शन गरेका छन्।
स्वतन्त्र चालक संघ नेपालको अगुवाइमा यातायात व्यवसायी तथा श्रमिकहरूले मंगलबार अस्पताल बाहिर प्रदर्शन गरेका हुन्। काठमाडौंको त्रिपुरेश्वरमा सोमबार बसमा जलेर चालक अर्जुन दोङको मृत्यु भएको थियो। उक्त घटनाको विरोधमा दोङका परिवार र यातायात व्यवसायीहरूले प्रदर्शन गरेका हुन्।
प्रदर्शनमा सहभागीहरूले घटनाको निष्पक्ष छानबिन गरी दोषीलाई कारबाही गर्नुपर्ने माग राखेका छन्। साथै, उनीहरूले ट्राफिक प्रहरीले अनावश्यक दुःख दिने गरेको आरोपसमेत लगाएका छन्।
प्रदर्शनमा सहभागीहरूले सवारी चालकहरूमाथि ट्राफिक प्रहरीले गर्ने ज्यादती बन्द गर्नुपर्ने, मृतक चालकका परिवारलाई उचित क्षतिपूर्ति उपलब्ध गराउनुपर्ने, चालक आयोग गठन गरी घटनाबारे निष्पक्ष छानबिन गर्नुपर्ने र दोषीलाई कारबाही हुनुपर्ने माग गरेका छन्।
संयुक्त ट्रेड युनियन समन्वय केन्द्र (जेटियूसीसी) का महासचिव नवराज दाहालले राज्यले सवारी चालक र सहचालकमाथि अन्याय गरेको आरोप लगाएका छन्। उनले सरकारले पीडितलाई उचित राहत दिएर दोषीलाई कारबाही नगरे श्रमिकहरू आन्दोलनमा उत्रिने चेतावनी दिए।
उनले भने, ‘यो राज्यले चालक र सहचालकमाथि गरेको अन्याय र अत्याचार हामी सहन सक्दैनौँ। यो कुरालाई सरकारले मनन गरोस्, प्रशासनले यसको उचित छानबिन गरोस् र पीडितलाई उचित क्षतिपूर्तिसहित न्याय देओस्। हाम्रो आवाज नसुनेमा आन्दोलनले उग्र रूप लिन सक्छ, त्यसको जिम्मेवारी स्वयं राज्य नै हुनेछ।’
काठमाडौंको त्रिपुरेश्वरमा बसमा आगलागी हुँदा जलेर गम्भीर घाइते भएका मकवानपुरका दोङको उपचारका क्रममा कीर्तिपुरस्थित बर्न अस्पतालमा सोमबार राति मृत्यु भएको थियो।