राष्ट्रिय स्वतन्त्र पार्टीकी सांसद रचना खतिवडाले आफ्नो छोराको बलिदान र न्यायको विषयमाथि भइरहेको राजनीतिक टिप्पणीप्रति आपत्ति जनाएकी छन्।
प्रतिनिधि सभाको मंगलबारको बैठकमा बोल्दै उनले आफू पदको लोभमा नभई शहीद परिवारको न्याय र देश सुधारका लागि संसद्मा आएको स्पष्ट पारिन्। सांसद खतिवडाले संसद्को रोस्ट्रमबाट बोल्दै आफूलाई ‘छोराको लाशसँग सांसद पद साटेको’ भनी लगाइएका अपमानजनक टिप्पणीको सशक्त प्रतिवाद गरिन्।
उनले आफ्नो राजनीतिक यात्रा व्यक्तिगत रहर नभई ‘जेन–जी’ आन्दोलनका क्रममा सहादत प्राप्त गरेका युवाहरूको न्यायका लागि भएको जिकिर गरिन्। सम्बन्धित राजनीतिक दल र सरकारलाई लक्षित गर्दै उनले जिम्मेवार भएर बोल्न आग्रह गरिन्।
खतिवडाले आफूले न्याय नपाएसम्म निरन्तर खबरदारी गरिरहने र न्याय प्राप्तिको दिन आफू पदबाट राजीनामा दिन एक सेकेण्ड पनि नहिचकिचाउने प्रतिबद्धता जनाइन्।
उनले भनिन्, ‘मेरो काख रितिएको छ, संसार उजाडिएको छ। यदि कसैले मेरो छोरालाई जिउँदो ल्याएर मेरो काखमा राखिदिन्छ भने म अहिले नै सांसद पद त्याग्न तयार छु। म कुनै माफिया बन्न वा जनतालाई उचालेर लडाउन आएकी होइन। म त एउटी शहीदकी आमा हुँ, जो आफ्नो छोरा जस्ता अरू छोराहरू नमरून् भनेर खबरदारी गर्न आएकी हुँ।’
सरकारसँग माग राख्दै सांसद खतिवडाले बन्दी बनाइएका आन्दोलनकारीको रिहाइ, घाइतेहरूको निःशुल्क उपचार र शहीद परिवारको चित्त बुझ्ने गरी न्याय निरूपण गर्न ध्यानाकर्षण गराइन्।