श्रम संस्कृति पार्टीका सांसद ध्रुवराज राईले भोटेकोशी बाढीबाट प्रभावित क्षेत्रको पुनर्निर्माण र राहत वितरणमा भइरहेको ढिलासुस्तीप्रति सरकारको गम्भीर ध्यानाकर्षण गराएका छन्।
प्रतिनिधि सभाको मंगलबारको बैठकमा उनले राहत पुर्याउने सडक तत्काल मर्मत गर्न र विस्थापितहरूको सुरक्षित पुनर्स्थापनाका लागि ठोस योजना ल्याउन माग गरेका हुन्।
सांसद राईले भोटेकोशी बाढी प्रभावित क्षेत्रको स्थलगत अवलोकनपछि त्यहाँको अवस्था अत्यन्त दर्दनाक रहेको संसद्लाई जानकारी दिए। उनले राहत बोकेका सवारीसाधन हिलोमा फसेको दृश्य आँखैले देखेको भन्दै पूर्वाधार मन्त्रालय मातहत बन्न लागेको वैकल्पिक सडकको निर्माण कार्य तीव्र बनाउन आग्रह गरे।
गत भूकम्पपछि बनाइएका घरहरू स्थानीय आवश्यकताअनुसार नभएको औँल्याउँदै उनले एकमुष्ट अनुदान दिएर जनतालाई आफ्नै शैलीमा घर बनाउन दिनुपर्ने सुझाव दिए।
उनले राजनीतिक विश्लेषक भरत दाहालको गिरफ्तारीलाई लिएरसमेत आपत्ति जनाए। अभिव्यक्ति स्वतन्त्रताको उपभोग गर्नेहरूलाई पक्राउ गर्नु गलत भएको भन्दै उनले सरकारले दोहोरो मापदण्ड अपनाएको आरोप लगाए।
देशमा व्याप्त महँगी र दैनिक उपभोग्य वस्तुको अभाव हटाउन पनि उनले सरकारसँग माग गरे।