सत्तारुढ दल राष्ट्रिय स्वतन्त्र पार्टीका सांसद ज्ञानेन्द्र सिंह महताले बिरामीको ज्यान बचाउने आपत्कालीन हवाई उद्धारमा देखिएको प्रक्रियागत र कानुनी जटिलताप्रति असन्तुष्टि जनाएका छन् ।
आफ्नो परिवारको सदस्यको जीवन रक्षाका लागि सरकारी निकाय धाउँदा पनि सहयोग नपाएपछि उहाँले बिहीवारको संसद् बैठकमा ‘मानव जीवनभन्दा ठूलो कानुन हुन नसक्ने’ भन्दै सरकारको ध्यानाकर्षण गराएका छन् । कञ्चनपुरको महाकाली अस्पतालमा भदौ ६ गते भर्ना भएकी भाइबुहारीको शल्यक्रियापछि स्वास्थ्य अवस्था एक्कासि जटिल बनेपछि सांसद महताले आपत्कालीन हवाई उद्धारको प्रयास गरेका थिए ।
चिकित्सकले बिरामीलाई सुविधासम्पन्न अस्पतालमा लैजान सुझाव दिएपछि उहाँले स्वास्थ्य, गृह र महिला, बालबालिका तथा ज्येष्ठ नागरिक मन्त्रालयमा सम्पर्क गरेका थिए । तर मन्त्रालयका जिम्मेवार पदाधिकारीबाट फोन नउठ्ने र फोन उठेको अवस्थामा पनि ‘कानुनी जटिलता’ भन्दै पन्छिने काम भएको उहाँले बताएका छन् ।
सभामुखको सहयोगमा केही प्रयास भए पनि अन्त्यमा निजी क्षेत्रको हेलिकप्टर प्रयोग गर्नुपर्ने अवस्था आएको बताएका छन् ।
सांसद महताले प्रश्न गर्दै भने, ‘म एक सांसद भएर राज्यको संयन्त्रसम्म पहुँच हुँदा त यति धेरै सास्ती छ भने दूरदराजका सर्वसाधारण नागरिकले कसरी आपत्कालीन उपचार पाउँछन् ?’
उहाँले हालको उद्धार प्रणालीमा रहेका प्रशासनिक झमेलाहरू तत्काल अन्त्य गर्न माग गरेका छन् । सांसद महताले चिकित्सकको सिफारिसका आधारमा तत्काल हवाई उद्धार गर्ने व्यवस्था लागू गर्न, स्वास्थ्य र गृह मन्त्रालय, सेना तथा नागरिक उड्डयन प्राधिकरणबीच २४ सै घण्टा समन्वय हुने संयन्त्र निर्माण गर्न सरकारलाई आग्रह गरेका छन् । कानुन नागरिकको जीवन बचाउन हुनुपर्नेमा अवरोधक बन्न नहुने उहाँको तर्क छ ।