अविरल वर्षाका कारण कान्ति राजमार्गका विभिन्न तीन स्थानमा पहिरो जाँदा सडक पूर्ण रूपमा अवरुद्ध भएको छ।
सडकमा उचित पानी निकासको व्यवस्था नहुँदा पहाडी भिरालो भागबाट बगेको पानी सिधै सडकमा पस्दा पिच उप्किने र ग्याबिन पर्खालसमेत जोखिममा पर्ने अवस्था देखिएको छ।
कान्ति राजमार्गमा देखिएको पछिल्लो सडक अवरोधले स्थानीयवासी र यात्रुलाई सास्ती दिएको छ। सडक निर्माणका क्रममा आवश्यक पानी निकासको दिगो व्यवस्था नहुँदा सामान्य वर्षामै समेत ठूलो क्षति व्यहोर्नुपर्ने अवस्था आएको हो।
सडकको माथिल्लो भागबाट आएको भलपानी नाली हुँदै सुरक्षित स्थानमा लैजानुको साटो सडकको पिचमै बग्न दिइएको छ। सडक किनारमा रहेका ग्याबिन पर्खालसमेत पानीको तीव्र बहावका कारण कमजोर बनेका छन्।
सडक सुरक्षाका लागि अपनाउनुपर्ने प्राविधिक मापदण्ड पालना नहुनु र समयमै मर्मतसम्भार नहुँदा कान्ति राजमार्ग बारम्बार अवरुद्ध हुने गरेको छ।