काठमाडौं । प्रधानमन्त्री बालेन्द्र शाहले संयुक्त राष्ट्रसंघको ८१औँ महासभामा नेपालका तर्फबाट जलवायु परिवर्तन र त्यसबाट हिमाली मुलुकले भोगिरहेको असरबारे धारणा राखेका छन्। प्रधानमन्त्रीको सम्बोधनका क्रममा उनका प्रमुख सल्लाहकार कुमार बेन पनि महासभा हलमा उपस्थित थिए।
काठमाडौं महानगरपालिकाको नेतृत्व गर्दादेखि नै शाहसँग नजिक रहेर सल्लाह दिँदै आएका बेन यसपटक भने फरक पहिरनमा देखिए। सार्वजनिक कार्यक्रममा प्रायः चेक सर्ट र ज्याकेटमा देखिने उनी महासभामा भने औपचारिक पोसाकमा उपस्थित भएका थिए।
न्युयोर्कतर्फ प्रस्थान गर्ने क्रममा विमानस्थलमा पनि बेन आफ्नै नियमित शैलीको पहिरनमा देखिएका थिए। तर संयुक्त राष्ट्रसंघको औपचारिक कार्यक्रममा उनी सेतो सर्ट, टाइ र कोट लगाएर उपस्थित भए।
उनले कोटमा सिलाम साक्मा पनि लगाएका थिए। प्रधानमन्त्री शाहले महासभामा सम्बोधन गरिरहँदा बेन दर्शकदीर्घाबाट ध्यानपूर्वक सम्बोधन सुनिरहेको अवस्थामा देखिन्थे।
बेनको सार्वजनिक उपस्थितिमा देखिने पहिरनले यसअघि पनि कहिलेकाहीँ चर्चा पाउँदै आएको छ। महासभामा उनको औपचारिक पोसाकमा देखिएको तस्बिर तथा उपस्थितिलाई लिएर यसपटक पनि सामाजिक सञ्जालमा विभिन्न प्रतिक्रिया देखिएका छन्।
यसैबीच प्रधानमन्त्री शाहले आफ्नो सम्बोधनमा नेपालले न्यून मात्रामा कार्बन उत्सर्जन गरे पनि जलवायु परिवर्तनको गम्भीर प्रभाव भोगिरहेको विषय अन्तर्राष्ट्रिय समुदायसमक्ष राखेका छन्। हिमालय क्षेत्रको संरक्षण, जलवायु न्याय तथा प्रभावित मुलुकका लागि अन्तर्राष्ट्रिय सहयोगको आवश्यकतामा उनले जोड दिएका थिए।