काठमाडौं । नेपाल राष्ट्र बैंकले बैंक तथा वित्तीय संस्थाबाट एकमहिने अवधिका लागि ३० अर्ब रुपैयाँ निक्षेप संकलन गर्ने भएको छ।
राष्ट्र बैंकको मौद्रिक व्यवस्थापन विभागले निक्षेप संकलन उपकरणमार्फत रकम संकलन गर्न बोलकबोल आह्वान गरेको हो।
केन्द्रीय बैंकका अनुसार उक्त बोलकबोल प्रक्रियामा इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागिता जनाउन पाउनेछन्।
बोलकबोलमा सहभागी संस्थाले न्यूनतम १० करोड रुपैयाँको प्रस्ताव पेश गर्नुपर्नेछ। त्यसपछि १० करोड रुपैयाँले पूर्ण रूपमा भाग जाने रकमका आधारमा कुल आह्वान गरिएको ३० अर्ब रुपैयाँसम्म प्रस्ताव गर्न सकिने व्यवस्था गरिएको छ।
राष्ट्र बैंकले बैंकिङ प्रणालीमा रहेको तरलता व्यवस्थापन गर्ने उद्देश्यले विभिन्न मौद्रिक उपकरणमार्फत समय–समयमा निक्षेप संकलन गर्दै आएको छ। यसपटक पनि सोही प्रक्रियाअन्तर्गत एकमहिने अवधिका लागि रकम संकलन गर्न लागिएको हो।