विपद्को सामना गरिरहेका नागरिकप्रति सरकार मौन र निरिहः सांसद रखाल

नेकपा (एमाले) की सांसद मीना सिंह रखालले बाढी, पहिरो र डुबानका कारण मुलुकले भोगिरहेको भयावह अवस्थाप्रति सरकारको ध्यानाकर्षण गराउँदै नागरिकको जीवन रक्षामा सरकार पूर्णतः चुकेको आरोप लगाएका छन् ।
राष्ट्रिय सभाको सोमवारको बैठकमा सांसद रखालले भदौ १० गतेको विनाशकारी बाढीबाट सिर्जित पीडा ताजै रहेका बेला असोजको शुरुवाती दिनहरूमा पुनः आएको अति भारी वर्षाले जनजीवन कष्टकर बनाएको बताएका हुन् । उहाँले भोटेकोसी र त्रिशूली करिडोरमा मात्रै करिव ७ हजार ५ सय ७० घरधुरीका ३२ हजारभन्दा बढी नागरिक प्रभावित भएको सरकारी तथ्यांक प्रस्तुत गर्दै पूर्वाधारमा पुगेको क्षतिले देशको अवस्था जर्जर बनेको उल्लेख गरे ।
विशेषगरी कर्णाली राजमार्गका विभिन्न खण्डहरू अवरुद्ध हुँदा स्थानीयको जनजीवन थप संकटमा परेको उहाँले बताए ।
रखालले भन्नुभयो, ‘नागरिकहरू प्राकृतिक प्रकोपसँग नाङ्गो छातीले जुधिरहेका छन्, तर सरकारको प्राथमिकताप्राप्त कार्यशैली र राहत वितरण प्रभावकारी देखिएन । जनताले सरकार आफूहरूको सेवक हो वा शासक भन्ने प्रश्न उठाउन थालेका छन् ।’
उहाँले विपद्को पूर्वसूचना हुँदाहुँदै पनि जोखिमयुक्त बस्तीको समयमै स्थानान्तरण र उद्धारमा सरकारले हेलचक्र्याइँ गरेको आरोप लगाए । सांसद रखालले सरकारका मन्त्री र उच्चपदस्थ अधिकारीहरूको भ्रमण केन्द्रित शैलीप्रति व्यंग्य गर्दै राष्ट्रिय स्वाभिमानको कुरा गर्नेहरूले जनताको चुलो बल्न नसकेको अवस्थामा संवेदनशीलता देखाउनुपर्नेमा जोड दिए ।