पर्यटकीय नगरी पोखरामा लागुऔषधको जालोः नयाँ स्वरुप र बढ्दो प्रयोग प्रहरीका लागि चुनौती

पर्यटकीय राजधानी पोखरामा पछिल्लो समय लागुऔषधको कारोबार र प्रयोग नयाँ स्वरूपमा देखिन थालेको छ ।
परम्परागत लागुऔषधका साथै विदेशी बजारमा प्रचलित नयाँ प्रकृतिका लागुऔषध समेत भित्रिन थालेपछि प्रहरीले यसलाई गम्भीर सुरक्षा चुनौतीका रूपमा लिएको हो । जिल्ला प्रहरी कार्यालय कास्कीका सूचना अधिकारी तथा प्रहरी नायव उपरीक्षक (डीएसपी) वीरेन्द्र पासवानकाअनुसार चालु आर्थिक वर्षको पहिलो त्रैमासिकमा लागुऔषध नियन्त्रणसम्बन्धी कारबाही र पक्राउ पर्नेको संख्यामा उल्लेख्य वृद्धि भएको छ । विगतका वर्षहरूको तुलनामा यस वर्ष प्रहरीले सक्रियता बढाएसँगै कारोबार र सेवनका घटनाहरू थप उजागर भएका हुन् ।
पोखराको पर्यटन र रात्रिकालीन मनोरञ्जनको केन्द्र हुनुको फाइदा उठाउँदै लागुऔषध कारोबारीहरूले आफ्नो सञ्जाल विस्तार गरिरहेको अनुसन्धानबाट खुलेको छ । विभिन्न क्षेत्रबाट आउने पर्यटक र स्थानीय युवाहरूलाई लक्षित गरी भइरहेका यस्ता गतिविधि नियन्त्रण गर्न प्रहरीले निगरानी बढाएको छ ।
उहाँले भन्नुभयो, ‘हामीले लागुऔषधको स्रोत र यसको वितरण सञ्जालबारे गहिरो अनुसन्धान गरिरहेका छौं । पर्यटकीय र मनोरञ्जन स्थलहरूमा हुने अस्वाभाविक गतिविधिप्रति प्रहरी विशेष सतर्क छ ।’
प्रहरीले पक्राउ परेका व्यक्तिहरूमाथिको अनुसन्धानबाट लागुऔषधको आपूर्ति कहाँबाट हुन्छ र यसका नाइकेहरू को हुन् भन्ने कुरा पत्ता लगाउने प्रयास गरिरहेको छ । पोखरा जस्तो संवेदनशील र पर्यटकीय क्षेत्रमा बढ्दो लागुऔषधको पहुँचले युवा पुस्ताको स्वास्थ्य र सुरक्षामा गम्भीर असर पार्ने भन्दै सरोकारवालाहरूले पनि चिन्ता व्यक्त गरेका छन् । प्रहरीले लागुऔषध मुक्त समाज निर्माणका लागि थप कठोर नीति अपनाउने तयारी गरेको छ ।