काठमाडौँ । अविरल वर्षाका कारण असोज ९ गतेदेखि अवरुद्ध रहेको बीपी राजमार्गमा यातायात सञ्चालनमा आएको छ। सडकमा अस्थायी डाइभर्सन निर्माण गरिएपछि साना सवारीसाधनलाई आवतजावत गर्न दिइएको हो।
सडक डिभिजन कार्यालय भक्तपुरका प्रमुख सुमन योगेशका अनुसार रोशी खोलामा आएको बाढीले सडकका विभिन्न स्थानमा बनाइएका डाइभर्सन बगाएपछि राजमार्ग अवरुद्ध भएको थियो। क्षतिग्रस्त स्थानमा पुनः डाइभर्सन निर्माण गरिएसँगै यातायात सञ्चालन सम्भव भएको उनले जानकारी दिए।
बाढीका कारण नमोबुद्ध–६ को चौकीडाँडा, रोशी–७ को घुमाउने तथा रोशी–११ र १२ अन्तर्गत माम्ती क्षेत्रमा डाइभर्सनमा क्षति पुगेको थियो। त्यस्तै, नमोबुद्ध–६ को चौकीडाँडा, रोशी–७ को चारसयवेशी, रोशी–८ को गिम्दीवेशी र रोशी–११ को माम्ती क्षेत्रमा पहिरोसमेत गएको थियो।
सडक डिभिजनका अनुसार चौकीडाँडा क्षेत्रमा खोलाको सतह तथा माथिल्लो भाग गरी दुई स्थानबाट डाइभर्सन तयार पारिएको छ।
हाल साना सवारीसाधनलाई मात्र राजमार्गमा सञ्चालनको अनुमति दिइएको छ। कार्यालयका अनुसार दिउँसोदेखि अन्य प्रकारका सवारीसाधनलाई समेत नियमित रूपमा सञ्चालन गर्न दिने तयारी गरिएको छ।
तर ६ चक्के मालवाहक सवारीसाधन, बस तथा मिनीबस सञ्चालनका लागि भने केही समय थप पर्खनुपर्ने जनाइएको छ। सडकको अवस्था र डाइभर्सनको क्षमता हेरेर ठूला सवारीसाधन सञ्चालनबारे निर्णय गरिनेछ।