काठमाडौँ । परराष्ट्रमन्त्री शिशिर खनाल संयुक्त राष्ट्रसंघको ८१औँ महासभामा सहभागी भएर अमेरिकाको न्युयोर्कबाट स्वदेश फर्किने क्रममा मंगलबार प्रस्थान गरेका छन्।
मन्त्री खनाल नेपाली प्रतिनिधिमण्डलका अन्य सदस्यसहित न्युयोर्कस्थित जोन एफ. केनेडी अन्तर्राष्ट्रिय विमानस्थलबाट कतारको दोहा हुँदै काठमाडौं आउने कार्यक्रम रहेको उनको सचिवालयले जनाएको छ।
निर्धारित तालिकाअनुसार उनी बुधबार बिहान काठमाडौं आइपुग्नेछन्।
संयुक्त राष्ट्रसंघको महासभामा सहभागी रहँदा खनालले विभिन्न उच्चस्तरीय बैठक तथा द्विपक्षीय भेटवार्तामा सहभागिता जनाएका थिए। ती भेटमा नेपालका प्राथमिकता तथा आपसी सम्बन्धसँग जोडिएका विषयमा छलफल भएको जनाइएको छ।
यसै महासभामा प्रधानमन्त्री बालेन शाहले पनि सहभागिता जनाएका थिए। प्रधानमन्त्री शाहले असोज ८ गते महासभालाई सम्बोधन गरेका थिए भने असोज १० गते नै स्वदेश फर्किएका थिए।