२० औं एशियाली खेलकुदमा सहभागिता जनाएको नेपाली आर्चरी टोलीले सन्तोषजनक सुधार गरे पनि पदकविहीन हुँदै आफ्नो चुनौती समाप्त गरेको छ ।
टोलीका प्रशिक्षक र खेलाडीहरूले आफ्नो व्यक्तिगत प्रदर्शनमा सुधार आएको बताए पनि अन्तर्राष्ट्रिय स्तरमा बढ्दो प्रतिस्पर्धा र आधुनिक अभ्यासको अभावका कारण अपेक्षित नतिजा हात पार्न नसकेको बताएका छन् ।
नेपाली आर्चरी टोलीका प्रशिक्षक प्रेमप्रसाद पुनले टोलीले नेपालको औसत स्कोर कायम राखे पनि विश्वस्तरको तीव्र प्रतिस्पर्धासँग जुध्न अझै धेरै काम गर्न बाँकी रहेको बताएका छन् ।
उनले भने, ‘हामीले ओलम्पिक वाइल्ड कार्डका लागि आवश्यक स्कोर प्राप्त गरेका छौँ, यो सकारात्मक पक्ष हो । तर, अन्य राष्ट्रका खेलाडीहरू युवा पुस्ता र आधुनिक प्रविधिसँगै धेरै माथि उक्लिसकेका छन् । हामीले आफ्नो स्तर त सुधारेका छौँ, तर विश्वस्तरसँगको खाडल अझै फराकिलो छ ।’
खेलाडी तिलक पुन मगरले व्यक्तिगत स्पर्धामा आफ्नो प्रदर्शनमा सुधार आए पनि अन्तिम नतिजा सोचेजस्तो नभएको बताएका छन् ।
उनले भने, ‘मेरो लक्ष्य ओलम्पिक क्वालिफाइङ स्कोर पुर्याउनु थियो, जुन पूरा भयो । तर अन्य प्रतिस्पर्धीहरूको स्तर यति धेरै माथि पुग्ला भन्ने सोचेको थिइनँ । विगतमा यही स्कोरले टप ३० मा स्थान बनाउँथ्यो, तर अहिले स्तर यति बढेको छ कि र्याङ्किङ खस्कियो । कतारका खेलाडीसँगको हारले निकै दुःखी तुल्याएको छ ।’
अर्का खेलाडी ज्ञानु अवालेका अनुसार प्रतिकूल मौसम र अनुभवको कमी नै टोलीको मुख्य कमजोरी रह्यो ।
उनले भने, ‘नेपालमा पानी पर्दा खेल्ने हाम्रो अभ्यास नै थिएन, जबकि यहाँ सुरुदेखि नै वर्षा भइरह्यो । पानीमा कसरी खेल्ने भन्ने अनुभव नहुँदा स्कोरिङमा समस्या भयो ।’
अवालेका अनुसार अन्तर्राष्ट्रिय मञ्चमा प्रतिस्पर्धा गर्न खेलाडीहरूलाई नियमित विदेशी एक्सपोजर र विशेष तालिमको तत्काल खाँचो छ ।