नेकपा (एमाले) का सांसद गुरु बरालले वर्तमान सरकार गठन भएको ६ महिना पूरा भए पनि नागरिकका अपेक्षा पूरा गर्न र सुशासन कायम गर्न सरकार पूर्णतः असफल भएको टिप्पणी गरेका छन्।
मंगलवार संघीय संसद् परिसरमा सञ्चारकर्मीसँग कुरा गर्दै सांसद बरालले सरकारको कार्यशैली, नियुक्ति प्रक्रिया र प्रधानमन्त्रीको पछिल्लो अमेरिका भ्रमणका नाटकीय घटनाक्रमले सरकारको विश्वसनीयतामा प्रश्न उठाएको बताएका छन्।
सांसद बरालले सरकारले ६ महिनाको अवधिमा उल्लेख्य काम गर्न नसकेको भन्दै विभिन्न सूचकमा सरकार चुकेको आरोप लगाए। उनले सुकुम्बासी समस्या समाधान, सार्वजनिक संस्थानमा भएका विवादित नियुक्ति र पारदर्शिताको अभावलाई सरकारको कमजोरीका रूपमा चित्रण गरे। ‘जान्नेलाई छान्ने’ भन्दै सत्तामा आएको सरकारले आफ्ना मान्छे भर्ती गर्ने उद्देश्यले संस्थानमा हस्तक्षेप गरेको उनको भनाइ छ।
आर्थिक क्षेत्रबारे चिन्ता व्यक्त गर्दै बरालले भने, ‘राजस्व संकलनमा गिरावट आएको छ, लगानीको वातावरण ठप्प छ र सेयर बजार ओरालो लागेको छ। सरकारले बजेट र मौद्रिक नीतिबाट अर्थतन्त्रलाई चलायमान बनाउन सकेन, जसका कारण निजी क्षेत्र लगानी गर्न डराइरहेको छ।’
प्रधानमन्त्रीको संयुक्त राष्ट्रसंघीय महासभाको भ्रमणबारे टिप्पणी गर्दै सांसद बरालले भ्रमणपछिको प्रस्तुति र एआई प्रविधिको प्रयोग गरी सार्वजनिक गरिएका नाटकीय तस्बिरहरूले नेपालको अन्तर्राष्ट्रिय प्रतिष्ठामा आँच पुर्याएको दाबी गरे।
साथै, प्रधानमन्त्रीले महासभाको भ्रमणबारे संसद्लाई जानकारी गराउनुपर्नेमा बेवास्ता गरेको भन्दै उनले प्रधानमन्त्री संसद्प्रति जवाफदेही नभएको आरोप लगाए।
बरालले बजारमा व्याप्त महँगी, कृत्रिम अभाव र मिसावट नियन्त्रण गर्न सरकारले पूर्ण असक्षमता देखाएको बताए। उनले सरकारका वाचा र व्यवहारमा ठूलो खाडल रहेको भन्दै ६ महिनाको समीक्षा गर्दा सुशासनका कुनै पनि सकारात्मक संकेत नदेखिएको जिकिर गरे।