काठमाडौं । सरकारले पूर्वप्रधानन्यायाधीश चोलेन्द्र शमशेर जबरालाई जेनजी समूहबाट नभई अपरिचित व्यक्तिहरूको समूहबाट सुरक्षा धम्की आएको जनाएको छ।
मंगलबार सिंहदरबारमा सञ्चारकर्मीसँग कुरा गर्दै सरकारका प्रवक्ता सस्मित पोखरेलले जबरालाई फोनमार्फत टेक्स्ट सन्देश पठाएर धम्की दिइएको जानकारी दिए।
धम्कीपछि सुरक्षाको संवेदनशीलतालाई ध्यानमा राख्दै जबरालाई सुरक्षित स्थानमा सारिएको पोखरेलले बताए। उनका अनुसार जेनजी समूहबाट सुरक्षा खतरा रहेको भन्ने विषय सरकारले सार्वजनिक नगरेको र त्यस्तो विवरण सञ्चारमाध्यममा आएको हो।
पोखरेलले जबरा सुरक्षित स्थानमा पुगेपछि पनि थप सुरक्षा जोखिम रहेको जानकारी उनको परिवारबाट प्राप्त भएको बताए।
सरकारका प्रवक्ताका अनुसार सुरुमा प्राप्त धम्कीपछि जबरालाई सुरक्षित स्थानमा लगिएको थियो। त्यसपछि पनि सम्भावित सुरक्षा जोखिमबारे परिवारले जानकारी गराएपछि सुरक्षा व्यवस्थालाई निरन्तरता दिइएको हो।