२८ असोज, काठमाडौं । काठमाडौंको कलंकीमा कुटपिटबाट एक युवकको मृत्यु भएको छ। घटनामा संलग्न रहेको आरोपमा प्रहरीले तीन जनालाई पक्राउ गरेको छ।
पक्राउ पर्नेमा सिन्धुलीको हरिहरपुरगढी गाउँपालिका–३ का १९ वर्षीय रुपेश पाख्रिनसहित तीन जना रहेका छन्।
प्रहरीका अनुसार बुधबार बिहान करिब साढे ३ बजे रुपेश र सोही ठाउँका १८ वर्षीय रोशन पाख्रिनबीच विवाद भएको थियो। विवादले उग्र रूप लिएपछि भएको कुटपिटमा रोशन गम्भीर घाइते भएका थिए।
घाइते रोशनलाई उपचारका लागि कलंकीस्थित शहीद मेमोरियल अस्पताल लगिएको थियो। उपचारकै क्रममा उनको मृत्यु भएको प्रहरीले जनाएको छ।
घटनाबारे अनुसन्धान गर्ने क्रममा प्रहरीले तीन जनालाई पक्राउ गरेको हो। पक्राउ परेकाहरूलाई प्रहरी वृत्त कालिमाटीको हिरासतमा राखेर घटनाबारे थप अनुसन्धान भइरहेको छ।