२९ असोज, काठमाडौं । नेपाली कांग्रेसको शेरबहादुर देउवा समूहअन्तर्गत कालिकोट जिल्ला सभापतिमा नगेन्द्रबहादुर विष्ट सर्वसम्मत चयन भएका छन्।
समूहले समानान्तर महाधिवेशनको तयारी अघि बढाउने क्रममा आयोजना गरेको जिल्ला अधिवेशनबाट विष्ट सभापतिमा निर्वाचित भएका हुन्। नेता भुपेन्द्रजंग शाहीले विष्ट सर्वसम्मत चयन भएको जानकारी दिए।
जिल्ला कार्यसमितिको उपसभापतिमा केशरसिंह बम र भरतबहादुर मल्ल चयन भएका छन्। त्यसैगरी, नेत्रबहादुर शाही र सविनकुमार विष्टलाई सचिवको जिम्मेवारी दिइएको छ।
नेता शाहीका अनुसार गोरखबहादुर बटाला कोषाध्यक्षमा तथा मनबहादुर बुढा र धिरबहादुर शाही सहसचिवमा चयन भएका छन्।
देउवा समूहले आगामी मंसिर २१ देखि २३ गतेसम्म नेपाली कांग्रेसको १५औँ महाधिवेशन गर्ने मिति घोषणा गरेको छ। सोही तयारीअन्तर्गत समूहले विभिन्न जिल्लामा अधिवेशनसमेत सञ्चालन गरिरहेको छ।