सर्बिया। सर्बियाका लामो समयदेखि प्रभावशाली नेता अलेक्जान्डर भुसिचले आकस्मिक संसदीय निर्वाचनमा आफ्नो पार्टी पराजित भएको स्वीकार गरेका छन्। विद्यार्थी नेतृत्वको भ्रष्टाचारविरोधी आन्दोलनले निर्वाचनमा सरकारविरोधी मतदाताको समर्थन जुटाएपछि देशका विभिन्न सहरमा उत्सव मनाइएको छ।
दक्षिणपन्थी लोकप्रियतावादी नेता भुसिचले आइतबार राति प्रारम्भिक नतिजाले आफ्नो पार्टीको हार स्पष्ट पारेको बताएका हुन्। अन्तिम नतिजा सार्वजनिक हुन बाँकी रहे पनि निर्वाचनमा आफ्नो पक्ष पराजित भएको उनले स्वीकार गरे।
भुसिच नेतृत्वको सर्बियन प्रोग्रेसिभ पार्टी (एसएनएस) ले दुई वर्षदेखि जारी सरकारविरोधी आन्दोलनको दबाबबीच आकस्मिक निर्वाचन गराएको थियो। सन् २०२४ मा नोभी साद सहरस्थित रेल्वे स्टेसनको छतको छज्जा खस्दा १६ जनाको मृत्यु भएपछि आन्दोलन सुरु भएको थियो। उक्त दुर्घटनालाई देशमा व्याप्त भ्रष्टाचार र सरकारी लापरबाहीको प्रतीकका रूपमा लिइएको थियो।
निर्वाचनमा भ्रष्टाचारविरोधी अभियान सञ्चालन गरेको विद्यार्थी समूह ‘स्टुडेन्ट लिस्ट’ ले सरकारसँग असन्तुष्ट मतदातालाई आफ्नो पक्षमा आकर्षित गरेको थियो। उक्त समूहले संसद्का २५० सिटका लागि चिकित्सक, कलाकार, प्राध्यापक र खेलकुद क्षेत्रका व्यक्तिसहित विभिन्न पृष्ठभूमिका उम्मेदवार प्रतिस्पर्धामा उतारेको थियो।
प्रारम्भिक विवरणअनुसार निर्वाचनमा अहिलेसम्मकै उच्च मतदान भएको जनाइएको थियो। निर्वाचन आयोगका अनुसार आइतबार साँझ ६ बजेसम्म ६४.९ प्रतिशत मतदाताले मतदान गरिसकेका थिए।
भुसिचले निर्वाचनमा हार स्वीकार गरेपछि राजधानी बेलग्रेडसहित विभिन्न सहरमा मानिसहरू सडकमा निस्किएका थिए। उनीहरूले नाचगान र आतसबाजी गर्दै खुसी मनाएका थिए।
विद्यार्थी समूहका प्रमुख उम्मेदवार इलिया स्र्दानोभिचले आन्दोलनको मुख्य उद्देश्य सर्बियालाई निरंकुश शासनबाट मुक्त गर्नु रहेको बताएका छन्।