सिरहा, ९ कात्तिक। सुनसरीको देवानगञ्जमा दुई समुदायबीच भएको झडपको प्रभाव सिरहाको गोलबजारसम्म फैलिएको घटनामा संलग्न रहेको आरोपमा गोलबजार नगरपालिका–११ का वडा अध्यक्ष सोहेव अनवरलाई प्रहरीले नियन्त्रणमा लिएको छ।
सार्वजनिक शान्ति खलल पार्न नहुने कसुरमा अनुसन्धानका क्रममा फरार रहेका वडा अध्यक्ष अनवरलाई पक्राउ गरिएको हो। घरमै लुकिछिपी बसिरहेको अवस्थामा वडा अध्यक्ष अनवरलाई नियन्त्रणमा लिएको इलाका प्रहरी कार्यालय गोलबजारका प्रहरी निरीक्षक दीपक खरेलले बताए। उनले भने, ‘वडा अध्यक्ष अनवरलाई साम्प्रदायिक दङ्गा भड्काएको आरोपमा पक्राउ गरिएको हो। पक्राउ परेका वडा अध्यक्षलाई थप अनुसन्धानका लागि राति नै जिल्ला प्रहरी कार्यालय पठाइएको छ।’
स्थानीयका अनुसार, वडा अध्यक्ष अनवरसहित करिब २० वटा मोटरसाइकलमा दुईदेखि तीन जनाका दरले सवार व्यक्तिहरू गोलबजार प्रवेश गरेका थिए। उनीहरूमध्ये केहीले धारिलो हतियार बोकेको र अर्को पक्षलाई गालीगलौज गर्दै ढुङ्गामुढा सुरु गरेपछि दुई पक्षबीच झडप भएको स्थानीयले दाबी गरेका छन्।
घटनामा वडा अध्यक्ष अनवरको संलग्नता रहेको दाबीसहित मोटरसाइकलमा सवार भएर गोलबजारतर्फ आउँदै गरेको भनिएको भिडियोसमेत सार्वजनिक भएको थियो। प्रहरीले उनलाई नियन्त्रणमा लिएसँगै घटनामा उनको भूमिका र झडपको वास्तविक कारणबारे थप अनुसन्धान हुने भएको छ।