हरेक वर्ष आश्विन शुक्ल पूर्णिमाबाट सुरु हुने यस मेलामा काठमाडौं उपत्यकासहित आसपासका विभिन्न स्थानबाट उल्लेख्य संख्यामा भक्तजनहरू सहभागी हुने गरेका छन् । कात्तिक शुक्ल पूर्णिमासम्म चल्ने यो मेला धार्मिक आस्थाका दृष्टिले महत्वपूर्ण मानिन्छ । लिच्छवीकालमा निर्मित आदिनाथ मन्दिर ऐतिहासिक तथा पुरातात्विक महत्व बोकेको सम्पदाका रूपमा परिचित छ ।
मन्दिरमा शिव र पार्वतीको संयुक्त स्वरूप झल्काउने मूर्ति स्थापना गरिएको छ । हिन्दू तथा बौद्ध धर्मावलम्बीहरूले यसलाई साझा आस्थाको केन्द्रका रूपमा पूजाआजा गर्दै आएका छन् । यस मन्दिरलाई अर्धनारीश्वर र आदिनाथ नामले समेत चिनिन्छ । मेलामा सहभागी हुँदा छालासम्बन्धी रोगबाट बच्न सकिने जनविश्वास रहेको छ । त्यस्तै, मन्दिरको दर्शन र पूजाआजा गर्नाले भय, रोग तथा विभिन्न बाधाबाट मुक्ति मिल्नुका साथै परिवारमा सुख, शान्ति र समृद्धि कायम हुने धार्मिक विश्वास छ ।
बौद्ध धर्मावलम्बीहरूले यस मन्दिरमा करुणाका प्रतीक लोकेश्वरका रूपमा पूजा गर्ने परम्परा अपनाउँदै आएका छन् । लामो आयु प्राप्त हुने, अकाल मृत्युबाट जोगिने र धनसम्पत्ति वृद्धि हुने विश्वासका साथ भक्तजनहरूले यहाँ पूजाअर्चना गर्ने गर्छन् । त्यसैगरी, हिन्दू धर्मावलम्बीहरूले आदिनाथलाई शिवशक्तिका रूपमा आराधना गर्ने परम्परा रहेको छ ।
काठमाडौं उपत्यकाको सुन्दर दृश्य अवलोकन गर्न सकिने यस मन्दिरको आसपासमा मञ्जुश्री पार्क, जलविनायक मन्दिर र टौदहलगायत धार्मिक तथा पर्यटकीय महत्वका स्थलहरू रहेका छन् । प्राचीन समयमा काठमाडौं उपत्यका पानीले भरिएको दहका रूपमा रहेको र मञ्जुश्रीले आफ्नो खड्ग प्रहार गरी पानी बाहिर निकाल्न मार्ग बनाएको धार्मिक कथनसँग जोडिएको चोभार गल्छी पनि यही क्षेत्रमा अवस्थित छ ।