काठमाडौं, ९ कात्तिक । उदयपुरको कटारी नगरपालिका–४, मरुवास्थित सिद्धिचरण राजमार्गमा जिप दुर्घटना हुँदा १५ जना घाइते भएका छन्। सोमबार बिहान भएको दुर्घटनामा घाइते सबैलाई उद्धार गरी उपचारका लागि अस्पताल पठाइएको प्रहरीले जनाएको छ।
प्रहरीका अनुसार प्र.३–०१–०२३ च ६५०६ नम्बरको जिपको ब्रेक फेल भएपछि सडकबाट करिब १० मिटर तल खसेर दुर्घटना भएको हो।
दुर्घटनामा घाइते भएकामध्ये कटारी नगरपालिका–२ का ७१ वर्षीय रामबहादुर मगरलाई थप उपचारका लागि विराटनगर पठाइएको छ। यस्तै, कटारी नगरपालिका–११ का २९ वर्षीय निर्पबहादुर खड्का सामान्य घाइते भएका छन्।
अन्य घाइतेहरूको कटारी अस्पतालमा उपचार भइरहेको प्रहरीले जनाएको छ। दुर्घटनाको कारण र घटनासम्बन्धी थप विवरणबारे प्रहरीले अनुसन्धान गरिरहेको छ।