जनताको निराशा जुनसुकै बेला आक्रोशमा बदलिन सक्छ : सांसद अर्जुननरसिंह केसी
सरकारको कार्यशैलीप्रति प्रश्न उठाउँदै केसीले बजार नियन्त्रण र प्रशासनिक सुधारमा जोड दिए
काठमाडौं । नेपाली कांग्रेसका सांसद अर्जुननरसिंह केसीले सरकार गठन भएको सात महिना बितिसक्दा पनि नागरिकले अपेक्षा गरेअनुसार दैनिक जीवनमा सुधारको अनुभूति गर्न नपाएको टिप्पणी गरेका छन्। उनले जनतामा बढ्दै गएको निराशाले कुनै पनि बेला आक्रोशको रूप लिन सक्ने भन्दै सरकारलाई सचेत रहन आग्रह गरेका छन्।
केसीका अनुसार चाडपर्वका समयमा समेत महँगी, बजारको अव्यवस्था र राजनीतिक उदासीनताका कारण सर्वसाधारणले समस्या भोग्नुपरेको छ। दसैँ, तिहार र छठजस्ता पर्वमा उपभोक्तालाई राहत हुने गरी बजार व्यवस्थापन गर्न सरकार प्रभावकारी हुन नसकेको उनको आरोप छ।
उनले बजार अनुगमन औपचारिकतामा सीमित भएको र मूल्यवृद्धि नियन्त्रणमा पर्याप्त ध्यान नदिइएको भन्दै मध्यमवर्गीय तथा आर्थिक रूपमा कमजोर परिवार बढी प्रभावित भएको बताएका छन्।
जेनजी आन्दोलनका माग र निर्वाचनबाट प्राप्त जनमतअनुसार शासन सञ्चालनको शैली परिवर्तन हुनुपर्नेमा पुरानै कार्यशैलीले निरन्तरता पाएको केसीको भनाइ छ। राजनीतिक नेतृत्व फेरिए पनि राज्य सञ्चालनमा अपेक्षित सुधार नदेखिएको उनले टिप्पणी गरेका छन्।
सरकार गठनदेखि हालसम्म उठेका सार्वजनिक सरोकारका प्रश्नलाई सम्बोधन गर्नुपर्ने उल्लेख गर्दै उनले नागरिकप्रति जवाफदेही हुनु सरकारको दायित्व भएको बताए। विगतका कमजोरीको आलोचनामा मात्र केन्द्रित नभई वर्तमान समस्याको समाधान खोज्नुपर्नेमा उनले जोड दिएका छन्।
केसीले अन्तर्राष्ट्रिय परिस्थिति, नेपालको संवेदनशील भूराजनीतिक अवस्थिति र आर्थिक चुनौतीलाई ध्यानमा राखेर सरकारले स्पष्ट रणनीति बनाउनुपर्ने बताएका छन्। उनका अनुसार आर्थिक कठिनाइ र नागरिकको निराशा सम्बोधन गर्न ठोस योजना आवश्यक छ।
उनले अस्वाभाविक मूल्यवृद्धि, सिन्डिकेट र कालोबजारी नियन्त्रणका लागि प्रभावकारी बजार अनुगमन गर्न सरकारसँग माग गरेका छन्। साथै, राजनीतिक नियुक्ति तथा प्रशासनिक सरुवा–बढुवामा योग्यता, क्षमता र पारदर्शितालाई आधार बनाउनुपर्ने बताएका छन्।
विधि र प्रक्रियालाई बेवास्ता गरेर अपेक्षित उपलब्धि हासिल गर्न नसकिने उल्लेख गर्दै केसीले राज्य सञ्चालनमा स्थापित कानुनी व्यवस्था र प्रक्रियाको पालना गर्नुपर्नेमा जोड दिएका छन्।