प्रहरीका अनुसार गुप्ता गत कात्तिक ६ गते शुक्रबार दिउँसो करिब ३ बजेदेखि आफ्नो पसलबाट बेपत्ता भएका थिए। परिवार र आफन्तले खोजी गरिरहेका बेला कात्तिक ८ गते आइतबार बिहान १० बजे सुनसरीको बर्जु गाउँपालिका–२, भीमपुरस्थित केशलीया खोला किनारमा एक पुरुषको शव फेला परेको सूचना प्रहरीले प्राप्त गरेको थियो। घटनास्थल पुगेको प्रहरी टोलीले उक्त शव बेपत्ता गुप्ताकै भएको पुष्टि गरेको थियो।
घटनाको गम्भीरतालाई ध्यानमा राख्दै प्रहरीले तालिमप्राप्त कुकुर र अपराध अनुसन्धानमा खटिने विशेष टोली परिचालन गरी अनुसन्धान अघि बढाएको थियो। सूक्ष्म अनुसन्धानपछि कात्तिक १० गते साँझ करिब ५ बजे हत्यामा संलग्न रहेको आशङ्का गरिएका व्यक्तिहरूको पहिचान गरी नियन्त्रणमा लिइएको सुनसरी प्रहरीले जनाएको छ।
प्रहरीको प्रारम्भिक अनुसन्धानअनुसार केही समयअघि विराटनगर–६ स्थित माता इलेक्ट्रिक वर्क्सबाट पानी तान्ने मोटरको तार चोरी गरेको आरोप अफरोज आलममाथि लागेको थियो। उक्त घटनाबारे गुप्ताले हल्ला फैलाएको भन्दै आलम र गुप्ताबीच विवाद उत्पन्न भएको खुलेको प्रहरीले जनाएको छ।
विवादकै क्रममा आलमले गुप्तालाई आफ्नो घरमा बोलाएर फलामको जीआई पाइपले प्रहार गरेको र त्यसबाट उनको मृत्यु भएको प्रारम्भिक अनुसन्धानबाट खुलेको प्रहरीको भनाइ छ। त्यसपछि शव लुकाउन तथा अन्यत्र फाल्न आलमले दुई जना नाबालकको सहयोग लिई केशलीया खोला किनारमा पुर्याएको प्रहरीले जनाएको छ।
अनुसन्धानका क्रममा प्रहरीले घटनामा प्रयोग भएको भनिएको फलामको जीआई पाइप, मृतकले प्रयोग गर्ने रेडमी कम्पनीको मोबाइल फोन र शव पोको पार्न तथा बोक्न प्रयोग गरिएको कार्पेट बरामद गरेको छ।
पक्राउ परेका व्यक्तिविरुद्ध ज्यानसम्बन्धी कसुरमा थप अनुसन्धान भइरहेको र कानुनी कारबाहीको प्रक्रिया अघि बढाइएको प्रहरीले जनाएको छ।