फ्लोरिकल्चर एसोसिएसन नेपाल (फ्यान) को आयोजनामा बिहीबारदेखि सुरु भएको प्रदर्शनी पाँच दिनसम्म सञ्चालन हुनेछ। आगामी १६ कात्तिकसम्म चल्ने मेलाको शुक्रबार दोस्रो दिन हो।
शुक्रबार बिहानैदेखि वर्षा भइरहे पनि फूल अवलोकन गर्न र बिरुवा खरिद गर्न सर्वसाधारणको उपस्थिति रहेको आयोजकले जनाएको छ।
प्रदर्शनीमा कुल ८६ वटा स्टल राखिएका छन्। तीमध्ये ७८ वटा व्यावसायिक, दुईवटा प्रतियोगितात्मक, चारवटा आधिकारिक स्टल, एउटा प्लान्ट क्लिनिक र एउटा फोटो सेल्फी स्टल रहेका छन्।
मेलामा यस वर्ष भित्रिएका नयाँ प्रजातिका गोदावरी फूलसहित ४५० भन्दा बढी प्रकारका फूल तथा बिरुवा प्रदर्शनी र बिक्रीका लागि राखिएका छन्। सयपत्री, मखमली, विभिन्न मौसमी फूल तथा सजावटका लागि प्रयोग गरिने बोटबिरुवाले प्रदर्शनीलाई आकर्षक बनाएका छन्।
आयोजकका अनुसार प्रदर्शनीमा ३९ हजारभन्दा बढी सर्वसाधारणले अवलोकन गर्ने अपेक्षा गरिएको छ। त्यस्तै, पाँच दिनको अवधिमा एक करोड ३० लाख रुपैयाँभन्दा बढीको व्यावसायिक कारोबार हुने अनुमान गरिएको छ।