सिरियाको आपत्कालीन मन्त्रालयका अनुसार मृत्यु हुनेमध्ये अधिकांश राका र डेर अल–जोर प्रान्तका ग्रामीण क्षेत्रका बासिन्दा रहेका छन् । बाढीमा बगेर बेपत्ता भएकाहरूको खोजीका लागि सुरक्षाकर्मी परिचालन गरिएको छ ।
राका, डेर अल–जोर र एलेप्पोका ग्रामीण क्षेत्रमा बेपत्ता भएकाहरूको खोजी कार्य जारी रहेको मन्त्रालयले विज्ञप्तिमार्फत जनाएको छ ।
बाढीमा फसेकाहरूको उद्धारका लागि सिरियन सिभिल डिफेन्सको टोलीले राका, डेर अल–जोर र होम्स प्रान्तबाट हालसम्म २५ जनालाई सकुशल उद्धार गरेको छ । बाढीका कारण फसेकाहरूलाई सुरक्षित स्थानमा सार्ने र सवारीसाधनभित्र थुनिएकाहरूलाई बाहिर निकाल्ने काम भइरहेको छ ।
भारी वर्षाका कारण उत्तरी तथा पूर्वी सिरियाका कृषि क्षेत्रमा ठूलो क्षति पुगेको छ । खेतबारी डुबानमा परेका छन् भने सडक र पुलहरू भत्किएका छन् ।
राका प्रान्तका तल्लो भूभागमा लेदोसहितको बाढी पसेपछि खेतीपाती र कृषि संरचनामा क्षति पुगेको छ । यसले स्थानीय किसानहरू थप प्रभावित भएका छन् । सडक सञ्जाल अवरुद्ध हुँदा प्रभावित क्षेत्रमा आवतजावत तथा राहत सामग्री ओसारपसारमा समेत कठिनाइ भएको छ ।
प्रशासनले प्रभावित क्षेत्रका बासिन्दालाई उच्च सतर्कता अपनाउन र बाढीग्रस्त क्षेत्रमा नजान आग्रह गरेको छ । वर्षा र बाढीका कारण उत्तरी तथा पूर्वी सिरियाका विभिन्न समुदायमा परेको पछिल्लो प्रभावले ठूलो भौतिक तथा मानवीय क्षतिको अवस्था उजागर गरेको छ ।