राष्ट्रिय सभामा उत्पत्ति भई प्रतिनिधि सभामा पठाइएको ‘राष्ट्रिय विधि विज्ञान प्रयोगशाला स्थापना र सञ्चालन विधेयक, २०८१’ राष्ट्रिय सभामा टेबुल भएको छ।
प्रतिनिधि सभाको बैठकले उक्त विधेयकमाथि छलफल गरी शिक्षा, स्वास्थ्य तथा सूचना प्रविधि समितिको प्रतिवेदनसहित संशोधनसहित पारित गरेपछि प्रक्रियागत रूपमा पुनः राष्ट्रिय सभामा फिर्ता पठाइएको हो।
बिहीवार बसेको राष्ट्रिय सभाको बैठकमा उक्त विधेयक प्राप्त भएको सन्देश औपचारिक रूपमा पेश गरिएको छ। राष्ट्रिय सभा नियमावली, २०७५ को नियम १२३ को उपनियम १ बमोजिम विधेयक फिर्ता पठाइएको सन्देश सभासमक्ष जानकारी गराइएको हो।
प्रतिनिधि सभाले गत असोज १४ गतेको बैठकबाट यो विधेयकलाई समितिको प्रतिवेदनका आधारमा संशोधन गर्दै पारित गरेको थियो। राष्ट्रिय विधि विज्ञान प्रयोगशाला स्थापना गर्ने विषयलाई प्राथमिकताका साथ हेरिएको छ।
अब राष्ट्रिय सभाले प्रतिनिधि सभाबाट आएका संशोधनहरूमाथि आवश्यक प्रक्रिया पूरा गरी विधेयकलाई अगाडि बढाउनेछ। संघीय संसद्का दुवै सदनबाट पारित भएपछि उक्त विधेयक प्रमाणीकरणका लागि राष्ट्रपतिसमक्ष पेश गरिनेछ।