नेकपा एमालेका सांसद क्षितिज थेबेले मकवानपुरको हेटौंडा र मनहरी क्षेत्रका मध्यवर्ती (बफर जोन) बासिन्दाले भोग्दै आएको कठिन जनजीवनका विषयमा सरकारको ध्यानाकर्षण गराएका छन् ।
शुक्रवार बसेको प्रतिनिधि सभा बैठकमा विशेष समय लिएर बोल्दै उनले वन्यजन्तुको त्रास र विकास निर्माणमा लगाइएको कडाइका कारण स्थानीयवासीको दैनिकी कष्टकर बनेको बताए । सांसद थेबेले मध्यवर्ती क्षेत्र संघर्ष समितिका प्रतिनिधिहरूसँगको भेटपछि त्यहाँको अवस्था अत्यन्त दयनीय रहेको सदनलाई जानकारी गराएका छन् । उनका अनुसार बफर जोनका कारण स्थानीय बासिन्दाले आफ्नो जीर्ण घर मर्मत गर्न र जग्गामा स–साना संरचना बनाउन समेत बन्देज भोग्नुपरेको छ । उनले विकास निर्माण र प्राकृतिक स्रोतको उपभोगमा समेत स्थानीयले अधिकार नपाएको गुनासो व्यक्त गरे ।
उनले भने, ‘वन्यजन्तुको त्रासले साँझ परेपछि आवतजावत गर्न पनि जोखिम छ । जंगली जनावरले घरपालुवा पशु चौपाया मार्ने र सडक दुर्घटनामा परी स्थानीयले बर्सेनि ज्यान गुमाउनु परिरहेको छ ।’
पटक–पटकको ध्यानाकर्षण र अघिल्ला सदनहरूमा समेत यो विषयले प्रवेश पाउँदा पनि समस्याको ठोस समाधान ननिस्किनु दुःखद् भएको भन्दै उनले असन्तुष्टि जनाए । उनले स्थानीयको माग बमोजिम बफर जोनको नीतिमा पुनरावलोकन गर्न र तत्काल समस्याको निकास निकाल्न सरकारसँग जोडदार माग गरेका छन् । – न्युज एजेन्सी नेपाल
#KshitizThebe #CPNUML #Makwanpur #Hetauda #Manahari #BufferZone #HumanWildlifeConflict #NepalParliament #NepalNews #UMLNepal