काठमाडौं, १६ असोज । फ्लाईदुबईका पाइलट स्मित मछारले बुधबार भएको शंकास्पद अपहरणको प्रयासपछि पहिलोपटक आफ्नो भनाइ सार्वजनिक गरेका छन्।
दुबईबाट इजरायलको तेलअभिव उडेको फ्लाईदुबईको विमानका पाइलट मछार कोपाइलटको हिंस्रक आक्रमणमा परेका थिए। अनेक जुक्ति लगाएर स्मितले विमानमा रहेका १७४ जना यात्रु बचाएका थिए। आफू गम्भीर घाइते भएर बाँच्नका लागि संघर्ष गरिरहँदा पनि ‘म अरू सबैलाई मर्न दिन चाहँदैनथे’ भनेर उनले बताएका छन्।
‘त्यो क्षणमा, म आफ्नो ज्यान बचाउन संघर्ष गरिरहेको थिएँ,’ मछारले शुक्रबार भारतका प्रधानमन्त्री नरेन्द्र मोदीसँगको भिडियो कलमा बताएका छन्, ‘म लडेको थिएँ, म यति गम्भीर रूपमा घाइते थिएँ कि म भुइँमा लडेको थिएँ। त्यो बेला म सोच्दै थिएँ कि यदि म उठ्न सकिनँ भने के होला?’
यात्रु र चालक दलका सदस्यहरूले साहसपूर्वक ककपिटमा प्रवेश गरेर विमानमाथि पुनः नियन्त्रण कायम गरेपछि ठूलो विमान दुर्घटना हुनबाट जोगिएको थियो। मछारले बताएका छन्, ‘जब उनले विमान तल खस्दै गरेको महसुस गरे, उनी ककपिटको भुइँमा थिए। र त्यो क्षणमा मलाई थाहा थियो– अन्तिम एकपटक जोड लगाऊ, स्मित। बस गर। ढोका ठीक त्यहीँ छ। र त्यो बेला पनि उसले मलाई कुटपिट गरिरहेको थियो।’
आफूले ढोका खोलिदिएपछि सबैजना यात्रु आएर आक्रमणकारीलाई नियन्त्रणमा लिएको उनले बताएका छन्। ‘म यो आफ्नो ज्यान बचाउन गरिरहेको थिएँ, तर सँगै मलाई यो पनि थाहा थियो कि म अरू सबैलाई मर्न दिन सक्दिनथेँ,’ उनले बताएका छन्।