जलवायु न्याय, स्थानीय पहल र विश्वव्यापी जलवायु कूटनीतिलाई जोड्ने उद्देश्यले काठमाडौं क्लाइमेट विक २०२६ शुक्रबारदेखि काठमाडौंमा शुरु भएको छ ।
‘जलवायु उत्थानशीलता निर्माणका लागि जलवायु न्याय ः स्थानीय पहलदेखि विश्वव्यापी जलवायु कूटनीतिसम्म’ भन्ने नाराका साथ शुरु भएको क्लाइमेट विकमा जलवायु परिवर्तनलाई वातावरणीय मुद्दामा मात्र सिमित नराखी स्थानीय समुदाय, राष्ट्रिय नीति र अन्तर्राष्ट्रिय कुटनीतिसँग जोडेर छलफल गरिने आयोजकले जनाएको छ । क्लाइमेट विकका आयोजक तथा वैकल्पिक ऊर्जा तथा जलवायु विज्ञ कुशल गुरुङले नेपालमा जलवायु परिवर्तनसम्बन्धी कार्यक्रम धेरै भएपनि जलवायु मुद्दालाई समाज र सहरको दैनिक जीवनसँग जोडेर समाधान खोज्न क्लाइमेट विक आयोजना गरिएको बताएका छन् ।
उनले भने, ‘हामीले जलवायु परिवर्तनलाई पहिला अन्तर्राष्ट्रिय विषय भन्थ्यौँ । भावी सन्ततिका लागि पृथ्वी राम्रोसँग छोडेर जानुपर्छ भन्ने सोचबाट शुरु भएको यो अभियान अहिले जलवायु परिवर्तनले हाम्रो घरआँगनमै असर पार्ने अवस्थामा आइपुगेको छ । अस्तिको घटनाले यो विषय कति ठूलो छ भन्ने देखाएको छ ।’
उनले क्लाइमेट विकको पहिलो बैठककै दिन रसुवामा बाढी आएको र त्यसपछि कार्यक्रम अघि बढाउने कि नबढाउने भन्नेमा समेत अन्योल भएको बताए । तर उक्त विपद्ले जलवायु संवादलाई न्याय र विश्वव्यापी ध्यानसँग जोडेर अघि बढाउनुपर्ने आवश्यकता झन् स्पष्ट पारेको उनको भनाइ छ ।
कार्यक्रमको उद्घाटन परराष्ट्रमन्त्री शिशिर खनालले गरेका छन् । अक्टोबर २ देखि ४ सम्म सञ्चालन हुने कार्यक्रममा नीति निर्माता, सांसद, जलवायु विज्ञ तथा अभियन्ता, स्थानीय तथा आदिवासी समुदाय, जलवायु प्रभावित समुदाय, युवा, अनुसन्धानकर्ता, निजी क्षेत्र, वित्तीय संस्था, सञ्चारकर्मी तथा विकास साझेदार सहभागी छन् ।
क्लाइमेट विकमा जलवायु वित्त, क्षति तथा नोक्शानी, जलवायु उत्थानशील पूर्वाधार, वैज्ञानिक तथ्याङ्क तथा अनुसन्धान, जैविक कृषि, चक्रीय अर्थतन्त्र, कृत्रिम बुद्धिमत्ता, निजी क्षेत्रको लगानी र युवाको भूमिकालगायत विषयमा छलफल हुनेछ ।
अक्टोबर ३ मा १७ वटा समानान्तर सत्र सञ्चालन हुनेछन् । अक्टोबर ४ मा अग्रपंक्तिका समुदाय र कार्यान्वयनका अनुभवमा केन्द्रित छलफल हुनेछ । युवाको नेतृत्वमा जलवायु न्याय तथा रसुवा–भोटेकोशी बाढीसम्बन्धी विशेष सत्र र सांसदहरूको सहभागितामा जलवायु न्यायसम्बन्धी संवाद पनि आयोजना हुनेछ । आयोजकका अनुसार क्लाइमेट विकले स्थानीय समुदायका अनुभव र भुइँतहका पहललाई राष्ट्रिय नीति तथा नेपालको अन्तर्राष्ट्रिय जलवायु कुटनीतिसँग जोड्ने प्रयास गर्नेछ । क्लाइमेट विकपछि अक्टोबर ५ मा सार्वजनिक फिल्म प्रदर्शनसमेत आयोजना गरिनेछ । – न्युज एजेन्सी नेपाल
#KathmanduClimateWeek #ClimateJustice #ClimateActionNepal #NepalClimateDiplomacy #ResilienceNepal #NepalNews