नेपाली काँग्रेसकी राष्ट्रिय सभा संसदीय दलकी नेता कमला पन्तले वर्तमान सरकारले राष्ट्रिय सभाको संवैधानिक अस्तित्व र संसद्को गरिमालाई निरन्तर उपेक्षा गरेको आरोप लगाएकी छन् ।
राष्ट्रिय सभाको चालु अधिवेशनको समापन बैठकलाई शुक्रवार सम्बोधन गर्दै उनले झन्डै दुई तिहाइको दम्भमा सरकारले संसदप्रतिको जवाफदेहिता गुमाएको र विपद् व्यवस्थापनदेखि जनसरोकारका मुद्दामा पूर्णतः निष्प्रभावी देखिएको दाबी गरेकी हुन् । अधिवेशनको समग्र समीक्षा प्रस्तुत गर्दै नेता पन्तले प्रतिनिधि सभा नियमावली संशोधनमार्फत राष्ट्रिय सभाको अधिकार र अस्तित्व खुम्च्याउने असंवैधानिक प्रयास भएको जिकिर गरेकी छन् । त्यस कदमविरुद्ध अदालतको ढोका ढक्ढक्याउनुपरेको र सर्वोच्च अदालतबाट न्याय प्राप्त भएको स्मरण गराउँदै उनले यस अधिवेशनलाई संविधानको रक्षा भएको अवधिका रूपमा व्याख्या गरेकी छन् । बहालवाला मन्त्रीहरूले समेत सार्वजनिक मञ्चहरूबाट राष्ट्रिय सभाको गरिमामाथि आँच आउने अमर्यादित अभिव्यक्ति दिने गरेको भन्दै उनले आपत्ति जनाइन् । भोटेकोशी बाढी र विपद् व्यवस्थापनको पूर्वतयारीमा सरकार पूर्ण रूपमा चुकेको आरोप लगाउँदै उनले संसद्ले पूर्वसचेतना गराउँदा गराउँदै पनि सरकारको उदासीनताले ठूलो मानवीय क्षति भएको बताएकी छन् ।
उनले भनिन्, ‘विपद्को तयारी, पूर्वउद्धार र राहतमा जुट्न छाडेर सरकार राजनीतिक प्रतिशोध र फजुल काममा अल्झियो । संसदको आग्रहलाई गम्भीरतापूर्वक नलिँदा बचाउन सकिने हजारौँ नागरिकले ज्यान गुमाउनुपरेको छ ।’
राष्ट्रिय सभाले नीति तथा कार्यक्रम, बजेट र अध्यादेशहरू पारित गर्न निरन्तर रचनात्मक सहयोग गरे पनि सरकारले त्यसलाई सभाको कमजोरीका रूपमा बुझेको उनको टिप्पणी छ । – न्युज एजेन्सी नेपाल
#KamalaPanta #NepaliCongress #NationalAssemblyNepal #NepalParliament #DisasterManagementNepal #NepalPolitics #NepalNew