नेपाल निर्माण व्यवसायी महासंघले महासंघका पूर्वअध्यक्ष शरदकुमार गौचनको नवौँ स्मृति सभा सम्पन्न गरेको छ ।
शुक्रबार महासंघको प्राङ्गणमा गौचनको सम्झनामा स्मृति सभा गरिएको हो । स्मृति सभामा महासंघका अध्यक्ष निकोलस पाण्डेले निर्माण क्षेत्रमा स्व. शरदकुमार गौचनको भूमिका महत्त्वपूर्ण रहेको बताएका छन् । उनले स्व. गौचनले निर्वाह गरेको महत्त्वपूर्ण भूमिकाको स्मरण गर्दै निर्माण क्षेत्रमा गौचनको अभाव सधैँ महसुस भइरहने बताएका छन् । यसैगरी महासंघका पूर्वअध्यक्ष तथा सल्लाहकार जयराम लामिछानेले निर्माण व्यवसायीहरूको विकासका लागि गौचनले सधैँ त्याग मात्र गरेको बताएका छन् । उनको जीवनीबाट व्यवसायीहरूले शिक्षा लिनुपर्ने उनको भनाइ थियो ।
२०७४ असोज २३ गते नयाँ बानेश्वरस्थित निवासबाट अनामनगरस्थित महासंघ कार्यालय आउने क्रममा गोली हानी गौचनको हत्या भएको थियो ।