रवि लामिछाने तारेख बुझ्न काठमाडौं जिल्ला अदालतमा
काठमाडौं, २३ असोज । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछाने काठमाडौं जिल्ला अदालत पुगेका छन् । स्वर्णलक्ष्मी सहकारी ठगी मुद्दामा तारेख बुझ्न उनी शुक्रबार दिउँसो बबरमहलस्थित काठमाडौं जिल्ला अदालत पुगेका हुन् ।
देशका पाँच जिल्लामा सहकारी ठगीसम्बन्धी मुद्दा खेपिरहेका लामिछानेका मुद्दा अझै अदालतमा विचाराधीन छन् । महान्यायाधिवक्ताको कार्यालयले लामिछानेविरुद्धको संगठित अपराध र सम्पत्ति शुद्धीकरणको कसुर फिर्ता लिने निर्णय गरेसँगै रुपन्देही, पोखरा र चितवनका अदालतबाट ती कसुरसम्बन्धी मुद्दा फिर्ता भएका छन् । अब लामिछानेविरुद्ध सहकारी ठगीको कसुरसम्बन्धी मुद्दा मात्र अदालतमा विचाराधीन छ ।
जीबी राईको गोर्खा मिडिया नेटवर्कमा देशका विभिन्न सहकारीको रकम गएको र अपचलन भएको आरोपमा लामिछानेविरुद्ध ठगी मुद्दा दायर भएको हो । अदालतले लामिछानेलाई काठमाडौंमै रहेका विभिन्न अदालतमा तारेख बुझ्न सुविधा दिने निर्णय गरेको थियो ।