२३ असोज, काठमाडौं । साताको कारोबारको अन्तिम दिन शुक्रबार नेपाली सेयर बजारमा सकारात्मक माहोल देखिएको छ। नेप्से परिसूचकसहित सबै समूहगत सूचकमा वृद्धि हुँदा बैंकिङ समूहमा लगानीकर्ताको आकर्षण बढी देखिएको छ।
शुक्रबार नेप्से परिसूचक १७.१५ अंकले बढेर २५९१ अंकमा पुगेको छ। बजारमा परिसूचक बढेसँगै कारोबार रकममा समेत सुधार आएको छ। अघिल्लो दिन ३ अर्ब ९३ करोड रुपैयाँ बराबरको कारोबार भएकोमा शुक्रबार ४ अर्ब ८३ करोड रुपैयाँको सेयर किनबेच भएको छ।
आज कारोबार भएका कम्पनीमध्ये १८० वटाको सेयर मूल्य बढेको छ भने ८९ कम्पनीको मूल्य घटेको छ। त्यस्तै, १० कम्पनीको सेयर मूल्यमा कुनै परिवर्तन भएन।
समूहगत सूचकतर्फ शुक्रबार बैंकिङ समूह सबैभन्दा अगाडि रह्यो। उक्त समूहको सूचक १.२८ प्रतिशतले वृद्धि भएको छ। विकास बैंक समूह ०.६१ प्रतिशत, फाइनान्स ०.३३ प्रतिशत, होटल तथा पर्यटन ०.९० प्रतिशत र जलविद्युत् समूह ०.७४ प्रतिशतले बढेका छन्।
यसैगरी, लगानी समूह ०.१६ प्रतिशत, जीवन बीमा ०.४४ प्रतिशत, उत्पादन तथा प्रशोधन ०.३७ प्रतिशत, माइक्रोफाइनान्स ०.१७ प्रतिशत, निर्जीवन बीमा ०.१८ प्रतिशत, अन्य समूह ०.२८ प्रतिशत र व्यापार समूह ०.३७ प्रतिशतले उकालो लागेका छन्।
शुक्रबार कुथेली बुखरी स्मल हाइड्रोपावरको सेयर मूल्य ४.९१ प्रतिशतले बढेको छ। सिन्धु विकास बैंकको ४.२२ प्रतिशत, सोलु हाइड्रोपावरको ४.०५ प्रतिशत र सान्भी इनर्जीको ३.८६ प्रतिशतले मूल्य वृद्धि भएको छ।
यता, रिजलाइन इनर्जीको सेयर मूल्यमा सबैभन्दा धेरै ७.८५ प्रतिशतको गिरावट आएको छ। महिला लघुवित्तको मूल्य २.०९ प्रतिशत र सयपत्री हाइड्रोपावरको २.०८ प्रतिशतले घटेको छ।
कारोबार रकमका आधारमा कुमारी बैंक, घलेम्दी हाइड्रोपावर, हिमालयन डिस्टिलरी, सोलु हाइड्रोपावर, लक्ष्मी सनराइज बैंक, सोनापुर मिनरल्स, एसवाई प्यानल र बलेफी हाइड्रोपावर अगाडि रहेका छन्।
#NepalStockMarket #NEPSE #ShareMarket #StockMarketUpdate #BankingSector #NepalShareMarket #InvestmentNews