शनिबार र आइतबार काठमाडौं उपत्यकामा विद्युत् आपूर्ति प्रभावित हुने
काठमाडौं, २३ असोज । मातातीर्थ–स्युचाटार १३२ केभी प्रसारण लाइनको स्तरोन्नति कार्यका कारण शनिबार र आइतबार काठमाडौं उपत्यकाको विद्युत् आपूर्ति प्रभावित हुन सक्ने भएको छ।
नेपाल विद्युत् प्राधिकरणअन्तर्गत सञ्चालित प्रसारण लाइन स्तरोन्नति आयोजनाले असोज २४ गते शनिबार र २५ गते आइतबार बिहान ९ बजेदेखि साँझ ५ बजेसम्म प्रसारण लाइन बन्द गरेर पुरानो कन्डक्टरको सट्टा उच्च क्षमताको नयाँ एचटीएलएस कन्डक्टर जडान गर्ने भएको छ।
डबल सर्किट प्रसारण लाइनको एउटा सर्किटमा करिब ४०० मिटर कन्डक्टर बदल्न बाँकी रहेको आयोजनाले जनाएको छ। काम सम्पन्न भएपछि प्रसारण लाइनको विद्युत् वहन क्षमता बढ्नुका साथै बढ्दो माग व्यवस्थापन गर्न र विद्युत् प्रणालीलाई थप भरपर्दो बनाउन सहयोग पुग्ने अपेक्षा गरिएको छ।
प्रसारण लाइन बन्द रहने अवधिमा मातातीर्थ, स्युचाटारलगायत सम्बन्धित सबस्टेसनबाट विद्युत् आपूर्ति हुने क्षेत्रमा सेवा प्रभावित हुन सक्नेछ। मौसम प्रतिकूल भएमा कार्यतालिका परिवर्तन हुन सक्ने प्राधिकरणले जनाएको छ।