नेकपा (एमाले) की वरिष्ठ नेता तथा पूर्वराष्ट्रपति विद्यादेवी भण्डारीले जलवायु परिवर्तनका कारण उत्पन्न जोखिम न्यूनीकरणका लागि वातावरण संरक्षण र पर्यावरणमैत्री पूर्वाधार निर्माणमा ध्यान दिन आवश्यक रहेको बताएकी छन्।
सोमबार काठमाडौंमा महेन्द्रप्रकाश शिवाकोटीद्वारा लिखित ‘देश विकासको प्रस्तावना’ र ‘राजनीतिक चेतना’ पुस्तक विमोचन कार्यक्रममा बोल्दै उनले यस्तो बताएकी हुन्। तापक्रममा भइरहेको असन्तुलित वृद्धिका कारण विश्वले गम्भीर चुनौती सामना गरिरहेको भए पनि हिन्दुकुश क्षेत्रको भूगोलमा पर्ने भएकाले नेपाल थप जोखिममा रहेको उनले बताइन्। हिमाली क्षेत्रमा दोहोरिरहेका विपद्ले जलवायु परिवर्तन र वातावरणीय जोखिम न्यूनीकरणमा गम्भीर हुनुपर्ने आवश्यकता औँल्याएको उनको भनाइ छ। उनले विपद्पछिको उद्धार र राहतमा मात्र सीमित नभई भविष्यमा हुन सक्ने क्षति न्यूनीकरणका लागि आवश्यक तयारी गर्नुपर्नेमा जोड दिइन्।
उनले भनिन्, ‘आज तापक्रमको असन्तुलित वृद्धिले विश्व नै गम्भीर चुनौतीको सामना गरिरहेको छ। हाम्रो देश नेपाल हिन्दुकुश क्षेत्रको भूगोलमा पर्ने हुँदा हामी झन् गम्भीर संकटमा छौँ। त्यसैले हिमाली क्षेत्रमा दोहोरिरहेका यस्ता विपद्ले जलवायु परिवर्तन र वातावरणीय जोखिम न्यूनीकरणमा गम्भीर हुनुपर्ने आवश्यकता औँल्याइरहेको छ। विपद्पछिको उद्धार र राहतसँगै भविष्यमा हुन सक्ने क्षति न्यूनीकरणका लागि वातावरण संरक्षण र सुरक्षित तथा पर्यावरणमैत्री पूर्वाधार निर्माणमा पनि दीर्घकालीन ध्यान दिन आवश्यक छ। यसका लागि तीनै तहका सरकार, राजनीतिक दल, सामाजिक संघसंस्था, निजी क्षेत्र र आम नागरिकबीच सहकार्य र समन्वय अनिवार्य र अपरिहार्य छ।’
उनले जलवायु परिवर्तनका चुनौती सामना गर्न तीनै तहका सरकार, राजनीतिक दल, सामाजिक संघसंस्था, निजी क्षेत्र र आम नागरिकबीच सहकार्य र समन्वयको आवश्यकता रहेको पनि बताइन्।