संयुक्त राज्य अमेरिकाका लागि प्रस्तावित राजदूत चिरनजंग थापाको संसदीय सुनुवाइ प्रक्रियामा सांसदहरूले उनको कार्ययोजना, कूटनीतिक प्राथमिकता र डायस्पोराप्रतिको दृष्टिकोणमाथि गम्भीर प्रश्न उठाएका छन्।
सोमबार बसेको संसदीय सुनुवाइ समितिको बैठकमा सांसदहरूले प्रस्तावित राजदूतको अनुभवको प्रशंसा गर्दै अमेरिकाजस्तो विश्वशक्तिसँग सम्बन्ध अघि बढाउँदा नेपालको असंलग्न परराष्ट्र नीति र राष्ट्रिय हितमा स्पष्टता हुनुपर्नेमा जोड दिएका हुन्। संसदीय सुनुवाइ समितिको बैठकमा नेकपा एमालेकी सांसद पद्मा अर्याल र नेपाली कम्युनिस्ट पार्टीका सांसद वर्षमान पुनले प्रस्तावित राजदूत थापाको कार्ययोजनाका विभिन्न बुँदामा स्पष्टीकरण मागे। सांसद अर्यालले अमेरिकामा रहेका नेपाली डायस्पोराले भोग्दै आएका दूतावाससम्बन्धी समस्या, उनीहरूको सेवा–सुविधा र सांस्कृतिक अपनत्वका विषयमा ठोस योजना प्रस्तुत गर्न आग्रह गरिन्। उनले राजदूतको कार्यकालमा नेपालले प्राप्त गर्ने ठोस नतिजा र एकवर्षीय कार्ययोजनाको खाका स्पष्ट नभएको भन्दै जिज्ञासा राखिन्।
सांसद वर्षमान पुनले प्रस्तावित राजदूत थापाको उच्च शैक्षिक र व्यावसायिक पृष्ठभूमिको प्रशंसा गरे पनि कार्ययोजनामा उल्लेखित कतिपय विषयमा असहमति जनाए। थापाले कार्ययोजनामा राखेको ‘अमेरिकी सैन्य शक्तिबाट लाभ लिने’ र ‘सैन्य तथा सुरक्षा सहयोग सुदृढ गर्ने’ प्रस्तावमाथि पुनले आपत्ति जनाए। उनले नेपालको संविधान र असंलग्न परराष्ट्र नीतिअनुसार सैन्य सहयोग प्राथमिकतामा पर्नुपर्ने हो कि होइन भन्दै प्रश्न गरे।
त्यस्तै, दूतावासका कर्मचारी र तिनका परिवारले अमेरिकी रीतिरिवाज पूर्ण रूपमा पालना गर्ने भनी कार्ययोजनामा उल्लेख गरिएको विषय व्यावहारिक नभएको भन्दै सांसद पुनले यसमा स्पष्ट हुन आग्रह गरे। उनले अमेरिका नेपालका लागि आर्थिक सहायता र लगानी भित्र्याउने दृष्टिकोणले महत्त्वपूर्ण भएकाले सोहीअनुसार कूटनीतिक सक्रियता बढाउन सुझाव दिए।