काठमाडौँ, २७ असोज । यमनको ताइजमा २४ घण्टाभित्र हुथी आक्रमणमा परी पाँच जनाको मृत्यु भएको छ ।
यमनको ‘नेटवर्क फर राइट्स एन्ड फ्रिडम्स’ (अधिकार तथा स्वतन्त्रतासम्बन्धी यमनी सञ्जाल) का अनुसार विगत २४ घण्टामा ताइज प्रान्तमा हुथी फौजबाट भएका ४३ वटा उल्लंघनका घटनामा पाँच सर्वसाधारणको मृत्यु भएको छ भने १७ जना घाइते भएका छन् ।
यमनको सरकारी समाचार संस्था ‘साबा’ द्वारा प्रकाशित प्रतिवेदनमा अधिकारवादी समूहले जनाएअनुसार मृत्यु हुनेमा पाँच वर्षीया अहलाम अब्दुलसलाम पनि छिन् । अल-मिसराख जिल्लामा रहेको उनको परिवारको घरमा गोलाबारी हुँदा उनको मृत्यु भएको थियो ।
उक्त समूहका अनुसार हुथी फौजले प्रान्तभरका आवासीय क्षेत्रमा मोर्टार, तोपका गोला, कात्युशा रकेट र ट्यांकका गोलाका साथै ड्रोनमार्फत १८० भन्दा बढी प्रहार गरेका थिए । ताइज सहरमा सातवटा घर, १२ वटा निजी सवारीसाधन, अल-सफवा अस्पताल र अल-सइद मस्जिदमा क्षति पुगेको प्रतिवेदनमा उल्लेख छ ।
निरन्तरको गोलाबारी र आपूर्तिमा लगाइएका प्रतिबन्धले मानवीय अवस्था झन् खराब बनाउँदै लगेको भन्दै संस्थाले चेतावनी दिएको छ । साथै, सर्वसाधारणको सुरक्षा गर्न तथा अत्यावश्यक सामग्री र स्वास्थ्य सेवामा पहुँच सुनिश्चित गर्न संयुक्त राष्ट्रसंघ र अन्तर्राष्ट्रिय समुदायलाई तत्काल कदम चाल्न आह्वान गरेको छ ।