रुपन्देही । निर्माणमा ढिलाइ गर्ने ठेकेदारमाथि कारबाही अघि बढाइरहेको सरकारले सत्तारूढ राष्ट्रिय स्वतन्त्र पार्टी (रास्वपा) का सांसद आबद्ध कम्पनीले जिम्मा लिएको बुटवलको सडक आयोजनामा भने पुनः समय थप गरेको छ । निर्माण सुरु भएको करिब एक दशक पुग्न लाग्दा पनि सम्पन्न नभएको राजमार्ग चौराहा–गोलपार्क सडक विस्तारको म्याद चौथोपटक लम्ब्याइएको हो ।
रुपन्देही निर्वाचन क्षेत्र नम्बर ५ बाट निर्वाचित रास्वपा सांसद तौफिक अहमद खान आबद्ध बाबुल दर्शन मालिका जेभीले निर्धारित समयभित्र काम पूरा गर्न नसकेपछि सडक डिभिजन कार्यालय बुटवलले आगामी मंसिर २९ गतेसम्मको समय दिएको छ । यसअघि थपिएको म्याद २०८३ असोज २० गते सकिएको थियो ।
पूर्वाधार विकासमन्त्री सुनील लम्सालको गृहजिल्लामै पर्ने यो आयोजनामा पटक–पटक समय थपिनुले सरकारको निर्माण व्यवस्थापन नीतिमाथि प्रश्न उठाएको छ । प्रधानमन्त्री र मन्त्रीहरूले ढिलासुस्ती गर्ने निर्माण कम्पनीमाथि कारबाही गर्ने बताउँदै आए पनि सत्तारूढ दलका सांसद जोडिएको आयोजनामा निरन्तर म्याद थपिएको भन्दै आलोचना भइरहेको छ ।
सडक डिभिजन कार्यालय बुटवलकी सूचना अधिकारी प्रज्ञा शर्माका अनुसार निर्माण कम्पनीसँग मंसिर २९ भित्र काम सम्पन्न गर्ने सहमति भएपछि अन्तिमपटकका लागि म्याद थपिएको हो ।
आयोजनाको भौतिक प्रगति गत असार मसान्तसम्म ६० प्रतिशत रहेकोमा अहिले ७५ प्रतिशत पुगेको छ । पछिल्लो तीन महिनामा ४० प्रतिशत काम सम्पन्न गर्ने लक्ष्य राखिए पनि अपेक्षित प्रगति हुन नसकेको कार्यालयले जनाएको छ । कम्पनीले हालसम्म ७२ प्रतिशत वित्तीय प्रगति हासिल गर्दै २१ करोड रुपैयाँभन्दा बढी भुक्तानी लिइसकेको छ ।
निर्माण गर्न बाँकी काममा गोलपार्क क्षेत्रमा दुवैतर्फको करिब ६०० मिटर सर्भिस लेन, बेससहितको थप ४०० मिटर सर्भिस लेन र मुख्य सडकको करिब एक किलोमिटर खण्डमा अन्तिम कालोपत्रे रहेका छन् ।
साढे तीन किलोमिटर लामो उक्त सडकलाई छ लेनमा विस्तार गर्ने योजना २०७३ चैत १७ गते सुरु भएको थियो । सुरुमा कञ्चनजङ्घा बिरुवा जेभीसँग ५३ करोड ९७ लाख ९९ हजार ४०० रुपैयाँमा ठेक्का सम्झौता गरिएको थियो । २०७६ भित्रै सम्पन्न गर्ने लक्ष्य राखिए पनि पटक–पटक म्याद थप्दा समेत काम पूरा हुन सकेन । त्यसपछि सडक डिभिजनले २०८१ वैशाखमा उक्त ठेक्का रद्द गरेको थियो ।
पुरानो ठेक्का रद्द भएपछि २०८१ असोज १८ गते बाबुल दर्शन मालिका जेभीसँग भ्याटसहित ३३ करोड रुपैयाँमा नयाँ सम्झौता गरिएको थियो । एक वर्षभित्र अर्थात् २०८२ असोज १८ सम्म निर्माण सक्ने सर्त राखिए पनि नयाँ कम्पनीले समेत निर्धारित समयमा काम पूरा गर्न सकेन ।
यस आयोजनालाई लिएर विगतदेखि नै स्थानीयवासी र राजनीतिक दलहरूले प्रश्न उठाउँदै आएका छन् । सरकार परिवर्तनसँगै सडक निर्माणको विषय राजनीतिक बहसको मुद्दा बन्ने गरे पनि व्यवहारमा आयोजनाले गति लिन सकेको छैन ।
निर्माणमा ढिलाइ हुँदा बुटवलको मुख्य बजार क्षेत्रका बासिन्दा, व्यापारी र यात्रु लामो समयदेखि धुलो, हिलो तथा अव्यवस्थित यातायातको समस्या झेल्न बाध्य छन् । पटक–पटक समयसीमा तोकिए पनि काम सम्पन्न नहुँदा स्थानीयमा निराशा बढेको छ ।
स्थानीय यादव मरासिनीले अब प्रतिबद्धता मात्र नभई निर्माणको वास्तविक अवस्था सार्वजनिक गर्नुपर्ने बताएका छन् । उनका अनुसार आयोजनामा भएको ढिलाइको जिम्मेवारी कसले लिने र पटक–पटक म्याद थप्नुको आधार के हो भन्ने विषय सरकारले स्पष्ट पार्नुपर्छ ।
अब मंसिर २९ गतेभित्र निर्माण सम्पन्न हुन्छ वा पुनः समय थपिन्छ भन्ने विषयमा स्थानीयवासीको चासो बढेको छ ।