काठमाडौं । चाडपर्वको समयमा हुन सक्ने मूल्यवृद्धि, कालोबजारी तथा बजार अनियमितता रोक्न सरकारले अनुगमनलाई थप प्रभावकारी बनाउने भएको छ।
मुख्यसचिव गोविन्दबहादुर कार्कीको अध्यक्षतामा सोमबार प्रधानमन्त्री तथा मन्त्रिपरिषद्को कार्यालयमा बसेको सचिवहरूको नियमित बैठकले चाडपर्व केन्द्रित बजार अनुगमनलाई तीव्र पार्ने निर्णय गरेको हो।
बैठकले कालोबजारी नियन्त्रणका लागि सम्बन्धित मन्त्रालयलाई सक्रिय र कडा रूपमा प्रस्तुत हुन निर्देशन दिने निर्णयसमेत गरेको छ। बजारमा हुन सक्ने अनियमितता नियन्त्रण गर्न आवश्यक निगरानी बढाउने विषयमा पनि जोड दिइएको छ।
यसैगरी, सरकारी निकायबाट प्रदान गरिने सेवा प्रभावकारी र चुस्तदुरुस्त भए–नभएको अनुगमन गर्ने निर्णय बैठकले गरेको छ।
मुख्यसचिवको नेतृत्वमा बस्ने सचिवहरूको यो नियमित बैठक हो। सामान्यतया महिनाको सोमबार आयोजना हुने बैठक दसैँको बिदाका कारण यसपटक सोमबार बसेको हो। बैठकमा अन्य समसामयिक विषयमा पनि छलफल भएको एक सचिवले जानकारी दिए।
#NepalGovernment #MarketMonitoring #GoodGovernance #ConsumerRights #DreamNewsNetwork