चीनसँग भएका सम्झौता कार्यान्वयनमा ढिलाइ हुँदा विकासमा असर परेको उल्लेख गर्दै भारत र चीन दुवैसँग कनेक्टिभिटी विस्तार गर्नुपर्नेमा जोड।
काठमाडौं । नेकपा एमालेका विदेश विभाग प्रमुख प्रदीप ज्ञवालीले नेपालको परराष्ट्र नीति राष्ट्रिय हितमा आधारित, स्वतन्त्र र सन्तुलित हुनुपर्ने बताएका छन्।
सोमबार काठमाडौंमा आयोजित ‘चीनको शासन सञ्चालनका प्राथमिकता र नेपाल–चीन सम्बन्धमा त्यसको प्रभाव’ विषयक गोष्ठीमा बोल्दै उनले कुनै पनि बाह्य शक्तिको प्रभावमा नपरी स्वतन्त्र कूटनीतिक दृष्टिकोण अपनाउनुपर्ने धारणा राखेका हुन्।
चिनियाँ कम्युनिस्ट पार्टीको २०औँ केन्द्रीय समितिको पाँचौँ पूर्ण बैठकसम्बन्धी छलफलमा ज्ञवालीले चीनले विश्व राजनीतिमा आफ्नो छुट्टै स्थान बनाइसकेको उल्लेख गर्दै त्यसलाई बेवास्ता गर्न नसकिने बताए। नेपालले चीनको अनुभवबाट धेरै विषय सिक्न सक्ने उनको भनाइ थियो।
नेपालको परराष्ट्र नीतिमा गौतम बुद्धको शान्ति र सहअस्तित्वको मार्गले समेत प्रभाव पारेको उल्लेख गर्दै उनले यही आधारमा स्वतन्त्र तथा सन्तुलित कूटनीति अघि बढाउनुपर्ने बताए। सन्तुलन कायम गर्न नसक्दा मुलुकले गम्भीर चुनौती सामना गर्नुपर्ने उनको धारणा थियो।
फ्रेन्ड्स अफ सिल्क रोड क्लब नेपाल र नेपाल–चाइना फ्रेन्डसिप फोरमले संयुक्त रूपमा आयोजना गरेको कार्यक्रममा ज्ञवालीले नेपाल र चीनबीच भएका कतिपय सम्झौता कार्यान्वयन हुन नसक्दा विकास निर्माणका काम प्रभावित भएको बताए।
उनले छिमेकी मुलुक भारत र चीन दुवैसँग सम्पर्क सञ्जाल (कनेक्टिभिटी) विस्तारका क्षेत्रमा सहकार्य गर्नुपर्ने आवश्यकता औँल्याए।
विश्वभर बढिरहेको द्वन्द्वले विभिन्न क्षेत्रमा चुनौती थपिरहेको उल्लेख गर्दै ज्ञवालीले गरिबी न्यूनीकरणमा चीनले महत्त्वपूर्ण भूमिका निर्वाह गरेको बताए। साथै, सत्तामा रहेको राजनीतिक दलको छवि स्वच्छ भए विकासका योजना अघि बढाउन सहज हुने उनको भनाइ थियो।