चालु आर्थिक वर्ष २०८३/८४ को पहिलो तीन महिनामा नेपालले विद्युत् निर्यात गरी १६ अर्ब १५ करोड रुपैयाँभन्दा बढीको कारोबार गरेको छ ।
भारततर्फ विद्युत् निर्यातको स्वीकृत क्षमता १ हजार १७९ मेगावाट पुगेको छ ।
बाढीका कारण अवरुद्ध बङ्गलादेशतर्फको ४० मेगावाट विद्युत् निर्यातसमेत पुनः सञ्चालनमा आएको छ ।
काठमाडौं । नेपालले विद्युत् निर्यातबाट उल्लेख्य आम्दानी गर्न थालेको छ । चालु आर्थिक वर्षको साउनदेखि असोजसम्मको तीन महिनामा नेपाल विद्युत् प्राधिकरणले विद्युत् बिक्रीबाट १६ अर्ब १५ करोड १३ लाख रुपैयाँ बराबरको कारोबार गरेको छ ।
ऊर्जा, जलस्रोत तथा सिँचाइ मन्त्रालयले सार्वजनिक गरेको पछिल्लो १५ दिनको कार्यप्रगति विवरणमा विद्युत् निर्यातसम्बन्धी तथ्यांक उल्लेख गरिएको हो । उक्त अवधिमा भारततर्फको निर्यात क्षमता विस्तार हुनुका साथै बङ्गलादेशसँगको विद्युत् व्यापार पनि पुनः सञ्चालनमा आएको मन्त्रालयले जनाएको छ ।
मन्त्रालयका अनुसार असोज महिनामा मात्रै भारततर्फ ६३ करोड ३९ लाख युनिट विद्युत् पठाइएको थियो । यसबाट प्राधिकरणले ५ अर्ब ९२ करोड ५० लाख रुपैयाँ बराबरको कारोबार गरेको छ ।
भारततर्फ विद्युत् निर्यात क्षमता १ हजार १७९ मेगावाट
नेपालले भारतीय बजारमा विद्युत् बिक्रीका लागि थप ३१ मेगावाटको अनुमति प्राप्त गरेको छ । नयाँ स्वीकृतिसँगै भारततर्फ विद्युत् निर्यात गर्न सकिने कुल क्षमता १ हजार १७९ मेगावाट पुगेको छ ।
निर्यात क्षमतामा भएको विस्तारले वर्षायाममा उत्पादन हुने अतिरिक्त विद्युत् भारतीय बजारमा बिक्री गर्न थप सहज हुने अपेक्षा गरिएको छ ।
बङ्गलादेशसँगको विद्युत् व्यापार फेरि सुरु
बाढीका कारण केही समयदेखि रोकिएको बङ्गलादेशतर्फको विद्युत् आपूर्ति पनि पुनः सञ्चालनमा आएको छ ।
ऊर्जा मन्त्रालयका अनुसार अवरुद्ध रहेको ४० मेगावाट विद्युत् निर्यात पुनः सुरु गरिएको हो । यससँगै नेपालले भारतपछि बङ्गलादेशसँगको विद्युत् व्यापारलाई पनि निरन्तरता दिएको छ ।
भारततर्फ निर्यात क्षमता विस्तार र बङ्गलादेशसँगको आपूर्ति पुनः सुरु हुनुले नेपालको विद्युत् व्यापारमा नयाँ अवसर थपिएको छ ।