कन्सास । अमेरिकी राज्य कन्सासमा डेमोक्र्याटिक पार्टीका उम्मेदवार एडम ह्यामिल्टनले ऐतिहासिक सफलता हासिल गरेका छन् । उनले रिपब्लिकन पार्टीका बहालवाला सिनेटर रोजर मार्सललाई पराजित गर्दै अमेरिकी सिनेटको यात्रा तय गरेका हुन् ।
रिपब्लिकनको बलियो प्रभाव रहेको कन्सासमा सन् १९३२ यता डेमोक्र्याटिक उम्मेदवारले सिनेटको सिट जित्न सकेका थिएनन् । लामो समयदेखिको राजनीतिक इतिहास उल्ट्याउँदै ह्यामिल्टनले हासिल गरेको जितलाई यसपटकको निर्वाचनको अप्रत्याशित परिणामका रूपमा हेरिएको छ ।
अमेरिकी सिनेटमा कुन दलको नियन्त्रण रहने भन्ने हिसाबले पनि यो प्रतिस्पर्धा महत्त्वपूर्ण मानिएको थियो । चुनावी अभियानका क्रममा ह्यामिल्टनले धार्मिक आस्थासँगै सर्वसाधारणको दैनिक जीवनसँग जोडिएका विषयलाई प्राथमिकता दिएका थिए । विशेषगरी महँगी, इन्धनको मूल्यवृद्धि र त्यसले कृषि तथा यातायात क्षेत्रमा पारेको प्रभाव उनका प्रमुख चुनावी मुद्दा बनेका थिए ।
युनाइटेड मेथोडिस्ट चर्चका संस्थापक तथा पादरीसमेत रहेका ह्यामिल्टनले चुनावी अभियानमा लोकतन्त्रको रक्षालाई पनि जोड दिएका थिए । उनले चुनावी प्रचारका क्रममा राजनीति र धर्मबारे खुलेर छलफल गर्नुपर्ने बताउँदै आगामी दुई वर्ष देशका लागि महत्त्वपूर्ण हुने धारणा राखेका थिए ।
ट्रम्पनिकट मार्सललाई धक्का
ह्यामिल्टनसँग पराजित भएका रिपब्लिकन उम्मेदवार रोजर मार्सल अमेरिकी राष्ट्रपति डोनाल्ड ट्रम्पका निकट समर्थक मानिन्छन् । मार्सललाई जिताउन ट्रम्प स्वयंले पनि चुनावी सभामा सहभागी भएर प्रचार गरेका थिए ।
पेशाले चिकित्सक रहेका मार्सलले ग्रामीण क्षेत्रमा स्वास्थ्य सेवा विस्तार गर्ने र कृषकलाई सहयोग गर्ने प्रतिबद्धता अघि सारेका थिए । तर, ट्रम्प प्रशासनको बजेट कटौतीसम्बन्धी निर्णयको समर्थन, कोरोना महामारीका बेला मास्क अनिवार्य गर्ने व्यवस्थाको विरोध र विवादित स्वास्थ्य नीतिप्रतिको उनको भूमिकाले आलोचना खेप्नुपरेको थियो ।
यसैबीच, चिकित्सकका रूपमा काम गर्दा उपचार खर्च नतिरेको आरोपमा आफ्नै करिब ७०० पूर्वबिरामीविरुद्ध मुद्दा दायर गरेको विषय सार्वजनिक भएपछि मार्सल थप विवादमा परेका थिए । ‘द न्यूयोर्क टाइम्स’ले यसबारे समाचार प्रकाशित गरेको थियो । उक्त विषयलाई ह्यामिल्टनको चुनावी टोलीले प्रचार सामग्रीमा समेत प्रमुखताका साथ उठाएको थियो ।
कन्सासको चुनावमा ११० मिलियन डलर खर्च
यसपटकको सिनेट निर्वाचन कन्सासको इतिहासमै सबैभन्दा महँगो चुनावी प्रतिस्पर्धा बनेको छ । एसोसिएटेड प्रेसका अनुसार चुनावी अभियानमा कुल ११० मिलियन अमेरिकी डलर खर्च भएको छ ।
रिपब्लिकनको परम्परागत प्रभाव रहेको राज्यमा डेमोक्र्याटिक उम्मेदवारको जित र चुनावमा भएको ठूलो खर्चले यस प्रतिस्पर्धालाई अमेरिकी राजनीतिक वृत्तमा थप चर्चित बनाएको छ ।