‘जेनजी आन्दोलनपछि पार्टीले ठूलो राजनीतिक क्षति बेहो¥यो, प्रत्यक्षतर्फ नौ सिटमा खुम्चिने अनुमान थिएन’
काठमाडौं । नेकपा एमालेका महासचिव शंकर पोखरेलले पार्टीलाई नयाँ दिशामा अघि बढाउन विगतका गल्ती र कमजोरीको निष्पक्ष समीक्षा आवश्यक रहेको बताएका छन् । पार्टी सञ्चालनदेखि राज्यसत्तामा रहँदासम्म भएका कामको मूल्याङ्कन नगरी आगामी राजनीतिक कार्यदिशा तय गर्न नसकिने उनको भनाइ छ ।
प्रवासी नेपाली मञ्च अन्तर्राष्ट्रिय कमिटीको दोस्रो अधिवेशनलाई सम्बोधन गर्दै पोखरेलले विगतका अनुभवबाट पाठ सिकेर नयाँ परिस्थितिअनुसार पार्टीलाई रूपान्तरण गर्नुपर्ने बताए । एमाले नेतृत्वमा बनेका दुईवटा नौमहिने सरकारबाहेक अन्य कार्यकालमा पनि महत्त्वपूर्ण काम भएको उल्लेख गर्दै उनले त्यसअनुसार जनताको समर्थन विस्तार हुन नसकेको विषयमा गम्भीर समीक्षा गर्नुपर्ने धारणा राखे ।
२०७४ सालमा बनेको शक्तिशाली वामपन्थी सरकारको उदाहरण दिँदै उनले सरकारको नेतृत्वमा रहँदा पनि वामपन्थी जनमत किन बढ्न सकेन भन्ने प्रश्नको जवाफ खोज्नुपर्ने बताए । समाज परिवर्तन र समाजवाद निर्माणको लक्ष्य बोकेको पार्टीले अनुकूल राजनीतिक अवसरलाई जनसमर्थन विस्तारमा किन उपयोग गर्न सकेन भन्ने विषय आत्ममूल्याङ्कनको मुख्य आधार हुनुपर्ने उनको भनाइ थियो ।
पोखरेलले गत भदौ २३ र २४ गते भएका घटनाले एमालेको राजनीतिक यात्रामा गम्भीर असर पारेको पनि बताए । पार्टीकै नेतृत्वमा सरकार रहेका बेला ती घटना हुनुले पार्टीको आगामी भविष्यबारे प्रश्न उठाएको उनको विश्लेषण छ ।
उनका अनुसार ती घटनापछि मुलुकको राजनीति प्रतिगमनतर्फ जान सक्ने निष्कर्ष निकाल्दै एमालेले भूराजनीतिक चुनौतीको सामना गर्ने रणनीतिसहित अघि बढ्ने प्रयास गरेको थियो । फागुन २१ गते सम्पन्न निर्वाचनमा पार्टीले विगतमा गरेका काम र भूराजनीतिक स्वार्थका विषय जनतामाझ स्पष्ट पार्दा समर्थन पुनः प्राप्त हुने अपेक्षा गरिएको भए पनि नतिजा अनुकूल आउन नसकेको उनले स्वीकारे ।
प्रत्यक्ष निर्वाचनतर्फ एमाले नौ सिटमा सीमित हुनुपर्ने अवस्था आउला भन्ने आफूहरूले कल्पनासमेत नगरेको पोखरेलले बताए । निर्वाचनमा अपेक्षित परिणाम नआएपछि पार्टीको आगामी दिशा तय गर्न कार्यकर्ताबाट सुझाव संकलन गरी समीक्षा प्रतिवेदन तयार पारिएको उनले जानकारी दिए ।
उनले कार्यकर्ताका सुझावका आधारमा मात्र अघि बढ्न पर्याप्त नहुने निष्कर्ष निकाल्दै सचिवालय बैठकबाट पार्टी पुनर्गठनसम्बन्धी कार्यदल गठन गरिएको बताए । उक्त कार्यदलले प्राप्त सुझावलाई समेटेर सहमतिका आधारमा ४० बुँदे सङ्कल्प प्रस्ताव तयार पारेको थियो ।
त्यसैलाई आधार बनाएर बसेको केन्द्रीय कमिटीको तेस्रो बैठकले पार्टीभित्रका समस्याको पहिचान गर्दै आगामी कार्यदिशाका लागि दुई प्रमुख कार्यभार र १५ वटा काम निर्धारण गरेको पोखरेलले जानकारी दिए ।
पार्टीलाई नयाँ ढङ्गले अघि बढाउने प्रयास भइरहेको उल्लेख गर्दै उनले विगतका उपलब्धि र कमजोरीको वस्तुनिष्ठ समीक्षा गरी बदलिँदो राजनीतिक परिस्थितिअनुसार संगठनलाई अघि बढाउनुपर्नेमा जोड दिए ।