इरानी संसद्का सभामुख एमबी गालिबाफले अमेरिकी मध्यावधि निर्वाचनको परिणामलाई युद्धविरोधी जनमतका रूपमा व्याख्या गरेका छन् । अमेरिकी नागरिकले निर्वाचनमार्फत युद्धप्रति असहमति प्रकट गरेको उनको दाबी छ ।
सामाजिक सञ्जाल एक्समार्फत प्रतिक्रिया दिँदै गालिबाफले अमेरिकी जनताले अन्तरात्माको आवाज सुनेर वा दैनिक जीवनयापनसँग जोडिएका समस्याका कारण युद्धविरुद्ध आफ्नो धारणा व्यक्त गरेको बताएका छन् । उनले अमेरिकी नागरिकको यस्तो सन्देशलाई इरानको समर्थन रहने पनि उल्लेख गरेका छन् ।
उनले अमेरिकी सरकारलाई आफ्नै नागरिकको इच्छाविपरीत निर्णय नगर्न चेतावनीसमेत दिएका छन् । अन्तर्राष्ट्रिय शक्तिकेन्द्र र दबाब समूहको प्रभावमा परेर जनभावनाविपरीत अघि बढे त्यसको गम्भीर परिणाम भोग्नुपर्ने उनको भनाइ छ ।
अमेरिकामा नोभेम्बर ३ मा सम्पन्न मध्यावधि निर्वाचनमा प्रतिनिधिसभाका सबै ४३५ सिट र सिनेटका १०० मध्ये ३५ सिटका लागि मतदान भएको थियो । यससँगै ३६ राज्यमा गभर्नर चयनका लागि पनि निर्वाचन भएको थियो ।
प्रारम्भिक मतपरिणाममा राष्ट्रपति डोनाल्ड ट्रम्पको रिपब्लिकन पार्टीलाई डेमोक्रेटिक पार्टीले चुनौती दिएको थियो । प्रतिनिधिसभामा डेमोक्रेटिक पार्टीले बहुमत प्राप्त गर्ने सम्भावना देखिएको प्रारम्भिक विवरणमा उल्लेख थियो ।
मतपरिणाम सार्वजनिक भइरहेका बेला राष्ट्रपति ट्रम्पले ‘द न्युयोर्क टाइम्स’सँगको कुराकानीमा निर्वाचनको परिणाम पूर्ण रूपमा स्वीकार गर्ने बताएका थिए । उनले विपक्षी दलसँग सहकार्य गरेर अघि बढ्न आफू इच्छुक रहेको धारणा पनि व्यक्त गरेका थिए ।