काठमाडौं । समस्याग्रस्त सहकारी व्यवस्थापन समितिले सातवटा समस्याग्रस्त सहकारीका १२२ बचतकर्तालाई बचत रकम फिर्ता गरेको छ। समितिका अनुसार २३ जनाले आफ्नो सम्पूर्ण बचत फिर्ता पाएका छन् भने ९९ जनाले आंशिक रकम प्राप्त गरेका छन्।
समितिले सार्वजनिक गरेको विवरणअनुसार नेपाल सहकारी वित्तीय सहकारी, आइडियल यमुना हाम्रो बहुउद्देश्यीय सहकारी र शिवशिखर सहकारीका २३ बचतकर्ताको पूर्ण रकम फिर्ता गरिएको हो।
त्यस्तै, कान्तिपुर सहकारी, गौतमश्री बहुउद्देश्यीय सहकारी, कृषि विकास बहुउद्देश्यीय सहकारी र श्री लालीगुराँस बहुउद्देश्यीय सहकारीका ९९ बचतकर्तालाई आंशिक रकम उपलब्ध गराइएको समितिले जनाएको छ।
बचतकर्तालाई वितरण गरिएको रकम सम्बन्धित समस्याग्रस्त सहकारीबाट ऋण असुली तथा सम्पत्ति व्यवस्थापनमार्फत प्राप्त भएको हो। सरकारले असुल गरेको रकमबाटै पीडितको बचत फिर्ता गर्ने प्रक्रिया अघि बढाइएको छ।
समितिले पहिलो चरणमा थोरै रकम बचत गरेका व्यक्तिलाई प्राथमिकता दिएर भुक्तानी गरेको जनाएको छ। आगामी दिनमा पनि बचत रकमको आकारअनुसार बचतकर्तालाई वर्गीकरण गरी क्रमशः रकम फिर्ता गरिनेछ।
समितिका अनुसार प्रचलित कानुनी व्यवस्थाअनुसार समस्याग्रस्त सहकारीका बचतकर्तालाई रकम फिर्ता गर्ने काम निरन्तर भइरहेको छ।