काठमाडौँ। नेपाल पत्रकार महासङ्घले प्रेस काउन्सिल ऐन, २०४८ संशोधनका लागि तयार गरिएको अध्यादेश जारी नगर्न राष्ट्रपति रामचन्द्र पौडेललाई आग्रह गरेको छ।
महासङ्घका अध्यक्ष निर्मला शर्माको नेतृत्वमा गएको प्रतिनिधिमण्डलले शुक्रबार राष्ट्रपति पौडेलसँग भेट गर्दै प्रस्तावित अध्यादेशका प्रावधानप्रति असन्तुष्टि जनाएको हो।
भेटका क्रममा महासङ्घका पदाधिकारी, सल्लाहकार तथा केन्द्रीय सदस्यहरूले अध्यादेशमा समेटिएका व्यवस्थाले प्रेस स्वतन्त्रता र अभिव्यक्ति स्वतन्त्रतामा पार्न सक्ने सम्भावित असरबारे राष्ट्रपतिको ध्यानाकर्षण गराएका थिए।
महासङ्घले प्रेस तथा अभिव्यक्ति स्वतन्त्रताको संरक्षणका लागि उक्त अध्यादेश जारी नगर्न राष्ट्रपतिसमक्ष आग्रह गरेको हो।