काभ्रेपलाञ्चोक। तिहार पर्वलाई लक्षित गर्दै काभ्रेपलाञ्चोक जिल्लाभित्रका मुख्य तथा सहायक सडकमा टिपर सञ्चालनमा रोक लगाइएको छ।
जिल्ला प्रशासन कार्यालय काभ्रेपलाञ्चोकले शुक्रबार सूचना जारी गर्दै कात्तिक २२ गते बिहान ५ बजेदेखि कात्तिक २६ गते राति ९ बजेसम्म टिपर सञ्चालन गर्न नपाइने जनाएको हो।
जिल्ला सुरक्षा समितिको बैठकले चाडपर्वका समयमा सडकमा सवारीसाधनको चाप बढ्ने र दुर्घटनाको जोखिमसमेत रहने भएकाले यस्तो निर्णय गरेको प्रशासनले जनाएको छ।
टिपर सञ्चालनमा रोक लगाउँदा यात्रुवाहक सवारीसाधनको आवागमन सहज हुने तथा सम्भावित दुर्घटना न्यूनीकरणमा सहयोग पुग्ने अपेक्षा गरिएको छ।
जिल्ला प्रशासन कार्यालयले तोकिएको अवधिभर जिल्लाका सबै मुख्य तथा सहायक सडकमा टिपर सञ्चालन नगर्न र नगराउन सम्बन्धित सबैलाई अनुरोध गरेको छ।